თბილისი, 20 მაისი – Sputnik. ქართველმა სუმოისტმა ლევან გორგაძემ, იგივე ტოჩინოშინმა იაპონიაში მიმდინარე ნაცუ ბაშოზე მეოთხედ გაიმარჯვა.
მაისის ბაშოს მე-12 დღეს 33 წლის ლევან გორგაძემ აღმოსავლეთის მეხუთე მაეგაშირა ჰოშორიუ იორიტაოშის ილეთით დაამარცხა. აღსანიშნავია, რომ ტოჩინოშინმა მონღოლი მეტოქე დოჰიოს მიღმა გადააგდო, რის შედეგადაც ჰოშორიუმ ტრავმა მიიღო.
ტოჩინოშინისთვის აღნიშნულ გამარჯვებას განსაკუთრებული მნიშვნელობა აღარ აქვს, რადგან ქართველს მიმდინარე ბაშოზე უკვე რვა მარცხი დაუგროვდა და მისთვის წოდებაში დაქვეითება გარდაუვალია. მიუხედავად ამისა, ქართველი სუმოისტი ყველა დარჩენილ შეხვედრაში გამარჯვებას შეეცდება, რათა ჩამოქვეითება მინიმალური იყოს.
ტოჩინოშინის მომდევნო მეტოქე დასავლეთის მეორე მაეგაშირა ტობიძარუ იქნება. ქართველი სეკიტორი 29 წლის იაპონელს კარიერაში ერთხელ შეხვდა და მაშინ დამარცხდა.
