თბილისი, 20 მაისი – Sputnik. საქართველოს პრემიერ-მინისტრი ირაკლი ღარიბაშვილი დამამთავრებელი კლასის მოსწავლეებს სწავლის დასრულებას ულოცავს და ცხოვრების გზაზე ახალი ნაბიჯების გადადგმისას წარმატებებს უსურვებს.
საქართველოს საჯარო სკოლების მე-12 კლასის მოსწავლეებისთვის სასწავლო პროცესი დღეს, 20 მაისს დასრულდა. საქართველოს მასშტაბით წელს სკოლას 38 650 მოსწავლე დაამთავრებს.
მთავრობის მეთაური აღნიშნავს, რომ სახელმწიფო მაქსიმუმს გააკეთებს, რათა ახალგაზრდებს ბედნიერი ცხოვრებისა და განვითარებისთვის ყველა შესაძლებლობა გარანტირებული ჰქონდეთ.
„დარწმუნებული ვარ, რომ მთელ ენერგიას მომავალშიც სწავლას და განვითარებას მოახმართ და საკუთარი ცოდნითა და პროფესიონალიზმით სხვადასხვა სფეროდან ერთგულად ემსახურებით სამშობლოს, იზრუნებთ ჩვენი ქვეყნის უკეთეს მომავალზე“, – წერს პრემიერი სოციალურ ქსელში.
ირაკლი ღარიბაშვილი მასწავლებლებს გაწეული შრომისთვის მადლობას უხდის.
დამამთავრებელი კლასების მოსწავლეებს სკოლის დასრულება საქართველოს განათლებისა და მეცნიერების მინისტრმა მიხეილ ჩხენკელმაც მიულოცა და წარმატებები უსურვა.
კორონავირუსის პანდემიის გამო წელს განათლების სამინისტრომ ზოგადსაგანმანათლებლო დაწესებულებებს რეკომენდაცია დაუგზავნა, რომლის თანახმად, შესაძლებელია ე.წ. ბოლო ზარის ორგანიზება, მხოლოდ მე-12 კლასის მოსწავლეებისა და პედაგოგების მონაწილეობით სკოლის ტერიტორიაზე, უცხო პირთა დასწრების გარეშე.
პანდემიის გამო უკვე მეორე წელია, რაც სკოლებში საგანმანათლებლო პროცესი პრევენციული წესების დაცვითა და ნაწილობრივ დისტანციური რეჟიმით მიმდინარეობს.
