მანიჟა, ანგელოზები და დემონები ევროვიზიაზე: რით გაგვაკვირვა კონკურსმა

© photo: Sputnik / Vladimir Astapkovich / გადასვლა მედიაბანკშირუსი მომღერალი მანიჟა ევროვიზიაზე
რუსი მომღერალი მანიჟა ევროვიზიაზე - Sputnik საქართველო, 1920, 19.05.2021
გამოწერა
18 მაისის საღამოს ნიდერლანდების ქალაქ როტერდამში ყველაზე კაშკაშა და ყველასაგან განსხვავებული მუსიკალური კონკურსი ევროვიზია 2021 დაიწყო.

მტანჯველი ორწლიანი მოლოდინი, რომლის განმავლობაშიც მილიონობით ადამიანმა მოასწრო Little Big-ის კლიპში Uno მოცეკვავე ფუშფუშას შეყვარება, დასრულდა. Rotterdam Ahoy-ს არენა უახლოეს კვირაში მუსიკალურ ცენტრად იქცევა არა მარტო ევროპისთვის, არამედ მთელი მსოფლიოსთვის.

დადგა დრო, როდესაც ამ მუსიკალურ-პოლიტიკური თავყრილობის მოყვარულებმა ორი წლის განმავლობაში კარადებში შენახული ბუმბულები, ბრჭყვიალა და ფერადი ალმები უნდა გამოალაგონ და უზრუნველად აქნიონ აქეთ-იქით მთელი ეს ჭრელაჭრულა „აღჭურვილობა“ მუსიკის თანხლებით - ევროვიზია დაიწყო.

ადამიანი-სპეცეფექტები

18 მაისს კონკურსის ორიდან ერთი ნახევარფინალი გაიმართა, რომლის შედეგებითაც ათი ფინალისტი გამოვლინდა.
და როგორც ყოველთვის, ევროვიზიას აბსოლუტურად დიდებული, მასშტაბური სცენოგრაფია და გრანდიოზული ტელესურათი ჰქონდა: უზარმაზარი ეკრანები, ლაზერის სხივები, ირგვლივ ყველაფერი ლივლივებდა და ნაპერკწლებს ისროდა, იყო გამაოგნებელი 3D პროექცია, ხოლო კონკურსის მონაწილეთა წარდგინების ვიდეოჩანართები ლამის ტელეხელოვნების ცალკე ნაწარმოებები იყო. 

თავად ევროვიზიის ერთ-ერთი წამყვანი Nikkie de Jager-ი ნამდვილ გიგანტურ სპეცეფექტსა და ზღაპრულ პერსონაჟს ჰგავდა - ასეთი სიმაღლისა თავად ბრიენასაც კი შეშურდებოდა „სამეფო კარის თამაშებიდან“.

ტელეწამყვანებს არც ევროვიზიის ორგანიზატორები და კონკურსის მონაწილეები ჩამორჩებოდნენ შთამბეჭდავი ვიზუალიზაციის კუთხით. ჩრდილომაკედონიელმა Vasil-მა გამოსვლის დროს, ყველაზე საზეიმო მომენტში, პიჯაკი გაიხსნა და... თავისი შუქმფენი „მაისურით“ მთელი არენა გაანათა.

© photo: Sputnik / Vladimir Astapkovich / გადასვლა მედიაბანკშიმომღერალი ვასილი
მანიჟა, ანგელოზები და დემონები ევროვიზიაზე: რით გაგვაკვირვა კონკურსმა  - Sputnik საქართველო, 1920, 19.05.2021
მომღერალი ვასილი

ხოლო ირლანდიელი Lesley Roy მთელი სამი წუთის განმავლობაში (ამდენ ხანს გრძელდებოდა ნომერი) მუყაოს ტყესა და ქაღალდის ქუჩებში დარბოდა.

მაგრამ ვერც Vasil-მა და ვერც Lesley Roy-მ, მიუხედავად ეფექტური ნომრებისა და სასიამოვნო მუსიკისა, კონკურსის ფინალში გასვლა ვერ მოახერხეს.

რაც შეეეხება რუსეთის წარმომადგენელ მანიჟას, რომელიც ასრულებდა სიმღერას Russian woman, ის სცენაზე ჩაიდნის სათბურა-თოჯინის სახით გამოცურდა. მის კოსტიუმს კარიც კი ჰქონდა დატანებული, საიდანაც მოხერხებულად გამოძვრა კიდეც რაღაც მომენტში.

მანიჟას გამოსვლა მთლიანობაში პარადოქსულად გამოიყურებოდა. ეს იყო ერთგვარი საშიში ნაზავი ყველაფრისგან და ერთბაშად. აქ იყო ფოლკლორიც, რეპიც, გუნდიცა და ცეკვებიც. ამ ყველაფრის ერთმნიშვნელოვანი პლუსი გახლდათ განწყობა, სითამამე და ტემპერამენტი. ევროპელებს მანიჟა მოეწონათ, რომელსაც თანამემამულეები ფინალში ჩავარდნას უწინასწარმეტყველებდნენ. ის კი „ადგა და გავიდა“, როგორც მის სიმღერაშია.

ანგელოზები და დემონები

ევროვიზია თავის სტილში დაიწყო: პირველ ნომრად ლიეტუვური ჯგუფი გამოვიდა, ქუსლებზე შემდგარი სოლისტით. და მაშინვე გასაგები გახდა, რომ სუსტი ნერვების მქონე არატოლერანტულ მაყურებელს უჯობდა, ეკრანებს დროებით მოშორებოდა.

ოდნავ მოგვიანებით სცენაზე შვედი მომღერალი გამოჩნდა, რომელმაც თავისი გარეგნობით უფროსი თაობის მაყურებელი ალბათ უფრო დააბნია.

თუმცა ევროვიზიის პირველი ნახევარფინალის მთავარ თემად იქცა ლამის რელიგიური და მითიური თემა სინათლისა და სიბნელის, კეთილისა და ბოროტის, ბოროტი ჯადოქრებისა და მშვენიერი პრონცესების დაპირისპირებისა.

სლოვენიის წარმომადგენელმა შთაგონებით იმღერა „ალილუია“, თუმცა ამ ღვთიურ ხოტბას მაშინვე სკანდალური ტრეკი მოჰყვა ეშმაკის შესახებ კვიპროსელი ლამაზმანის მხრიდან. 

სლოვენიელ არტისტს ნორვეგიელი შემსრულებელი წამოეშველა დაცემული ანგელოზის სამოსში. თუმცა თავისი ბრჭყვიალა კოსტიუმითა და ქურქით ის უფრო ზამთრის ძილისგან ახლად გამოფხიზლებულ „სნეგუროჩკას“ ჰგავდა.
ანგელოზმა-სნეგუროჩკამ, სამწუხაროდ, ვერაფერი უშველა სლოვენიელს, ფინალში გასვლაში ვერ დაეხმარა, და კვიპროსელმა, ევროვიზიისთვის ლოგიკურად, ბნელის სინათლეზე გამარჯვება იზეიმა.

ანგელოზებსა და დემონებს შორის ამ დაუნდობელ ბრძოლაში გაიელვა აზერბაიჯანელმა არტისტმა სიმღერით მატა ჰარიზე, და ჯგუფმა უკრაინელი სოლისტით, რომელიც ჯადოქარ მალეფისენტას ჰგავდა. ორივე მათგანი ფინალში გავიდა ნორვეგიელ, ისრაელელ, რუს, მალტელ, ლიეტუველ, კვიპროსელ, შვედ და ბელგიელ მომღერლებთან ერთად.

მთლიანობაში ევროვიზიის პირველმა ნახევარფინალმა სასიამოვნოდ გააკვირვა მსმენელ-მაყურებელი ხარისხიანი სიმღერებითა და კაშკაშა, ეფექტური ნომრებით.

განსაკუთრებით შეიძლება აღინიშნოს მალტა, თავისი ფუშფუშა და პოზიტიური წარმომადგენლით, რუსეთის - ქარიზმატული მანიჟათი, ნორვეგია - გლამურული ანგელოზით, შვედეთი - სიმღერით მილიონობით ხმის შესახებ და ისრაელი - მომღერლით, რომელიც ირწმუნება, რომ კონკურსზე ყველაზე მაღალი ნოტის აღება შეუძლია.

ვისი ლოცვა, ჯადოსნობა, ლოზუნგები თუ სხვა არგუმენტები გამოდგება უფრო ეფექტური კონკურსში გამარჯვებისთვის, ეს ევროვიზიის ფინალში გახდება ცნობილი 22 მაისს.

ყველა ახალი ამბავი
0