თბილისი, 17 მაისი – Sputnik. ძალიან ოპტიმისტურად ვართ განწყობილი, გვაქვს ხელმოწერილი ხელშეკრულებები და ამ უახლოესი თვეების განმავლობაში ვაქცინების დამატებით დოზებს მივიღებთ, განაცხადა საქართველოს პრემიერ-მინისტრმა ირაკლი ღარიბაშვილმა მთავრობის დღევანდელ სხდომაზე.
როგორც მთავრობის მეთაურმა განაცხადა, ვაქცინების თაობაზე მოლაპარაკებები მიდის როგორც უშუალოდ მწარმოებლებთან, ასევე COVAX-პლატფორმასთან და ვაქცინაციის პროცესში არავითარი შეფერხება არ იქნება.
„უფრო კონკრეტულად რომ გითხრათ, საუბარია Pfizer-ის დამატებითი ვაქცინების შემოტანაზე ზაფხულში, დაახლოებით ივნისი-ივლისში. მილიონ დოზაზე გვაქვს მოლაპარაკება. გვაქვს მოლაპარაკება ჩინური „სინოფარმისა“ და „სინოვაკის“ ქარხნებთან, ასევე „მოდერნასთან“ და „ნოვავაქსის“ ახალი ვაქცინის შემოტანასთან დაკავშირებით“, – განაცხადა პრემიერმა.
საქართველოში კორონავირუსის საწინააღმდეგო ვაქცინაცია 15 მარტს პრეპარატ AstraZeneca-თი მედპერსონალიდან დაიწყო. დაბალი მიმართვიანობის გამო ჯგუფების რაოდენობა ეტაპობრივად გაიზარდა.
ვაქცინირებული თანამშრომლები: საქართველოში კომპანიებისთვის შეღავათებს ამზადებენ>>
ამ დროისათვის საქართველოში ხელმისაწვდომია AstraZeneca-ს, Pfizer-ის და Sinopharm-ის ვაქცინები.
ბოლო მონაცემებით, საქართველოში კორონავირუსის საწინააღმდეგო აცრა 89.260 ადამიანმა გაიკეთა, მათგან სრულად, ორი დოზით ვაქცინირებულია 14 ათასზე მეტი.
