თბილისი, 13 მაისი – Sputnik. გაეროს გენერალურმა მდივანმა ანტონიუ გუტერეშმა განაცხადა, რომ მიმდინარეობს ჯანდაცვის მსოფლიო ორგანიზაციის (ჯანმო) მიერ კორონავირუსის საწინააღმდეგო რუსული ვაქცინა „სპუტნიკ V“-ს აღიარების პროცესი. ამის შესახებ წერს РИА Новости.
„რა თქმა უნდა, მივესალმებოდით ჯანმოს მიერ ვაქცინა „სპუტნიკ V“-ს აღიარებას. ვიცი, რომ პროცესი მიდის. ვაფასებთ, რომ რუსეთმა შესაძლებლობა მოგვცა, გაეროს თანამშრომლები „სპუტნიკ V“-თი აგვეცრა. ეს ძალიან კარგი ნიშანია. მიგვაჩნია, რომ „სპუტნიკ V“ ასევე ერთ-ერთი საკვანძო ელემენტია, რომელიც ვაქცინაციის პრობლემის გადაწყვეტის საშუალებას მოგვცემს“, – განაცხადა გუტერეშმა რუსეთის საგარეო საქმეთა მინისტრ სერგეი ლავროვთან მოსკოვში მოლაპარაკებების შემდეგ.
კორონავირუსის საწინააღმდეგო რუსული ვაქცინა „სპუტნიკ V“ უკვე 64 ქვეყანაშია აღიარებული, რომელთა მოსახლეობა ჯამურად 3,2 მლრდ ადამიანს აღემატება. სახელმწიფო რეგულატორების მხრიდან მოწონების მხრივ „სპუტნიკ V“-ს მსოფლიოში მეორე ადგილი უკავია. ვაქცინის ეფექტურობა, რუსეთის 3,8 მლნ ვაქცინირებული მოქალაქის ანალიზის მონაცემებით, 97,6%-ს შეადგენს. ეს უფრო მეტია, ვიდრე უფრო ადრე სამედიცინო ჟურნალ The Lancet-ის მიერ გამოქვეყნებული მონაცემი (91,6%).
