თბილისი, 11 მაისი – Sputnik. საქართველოში საჰაერო გზით კენიის რესპუბლიკიდან 5,7 ათასი სხვადასხვა სახეობის დაბინძურებული მოჭრილი ყვავილი შემოიტანეს, ნათქვამია ფინანსთა სამინისტროს შემოსავლების სამსახურის მიერ გავრცელებულ ინფორმაციაში.
საბაჟო დეპარტამენტის სანიტარიული, ფიტოსანიტარიული და ვეტერინარული კონტროლის სამმართველოს თანამშრომლებმა დაადგინეს, რომ საქონელი დაბინძურებული იყო მავნე მწერებით. აღებული ნიმუშების ლაბორატორიული კვლევის შედეგად გამოვლინდა საკარანტინო მავნე ორგანიზმი Frankliniella occidentalis.
ესაა კულტურულ მცენარეთა ერთ-ერთი ყველაზე სახიფათო მავნებელი, ასევე მცენარეების ვირუსულ დაავადებათა გადამტანი.
საქართველოს მთავრობის დადგენილების თანახმად, აღნიშნული საქონელი განადგურდა.
