თბილისი, 10 მაისი – Sputnik. არასრულწლოვანი მსჯავრდებულები გრაფიკული დიზაინის ონლაინ კურსს გაივლიან, რომლის ფარგლებშიც შესაბამისი პროგრამების შესახებ საბაზისო ცოდნას მიიღებენ, აღნიშნულია მსჯავრდებულთა პროფესიული მომზადებისა და გადამზადების ცენტრის მიერ გავრცელებულ განცხადებაში.
უწყების ცნობით, მსჯავრდებულები ორი თვის განმავლობაში Adobe Illustrator CC-ში მუშაობის ძირითად პრინციპებს დაეუფლებიან.
პროექტს მსჯავრდებულთა პროფესიული მომზადებისა და გადამზადების ცენტრი ილიას სახელმწიფო უნივერსიტეტის მომავლის სამრეწველო ინოვაციების ლაბორატორიასთან თანამშრომლობით ახორციელებს.
თანამშრომლობის შესახებ შესაბამისი მემორანდუმი საქართველოს ინოვაციების და ტექნოლოგიების სააგენტოსა და მსჯავრდებულთა პროფესიული მომზადებისა და გადამზადების ცენტრს შორის გასულ თვეში გაფორმდა.
