თბილისი, 21 აპრილი – Sputnik. საქართველოს ნაკრების ფეხბურთელები ლაშა დვალი და გიორგი ხარაიშვილი „ფერენცვაროშის“ შემადგენლობაში უნგრეთის ჩემპიონები გახდნენ.
დვალმა ამ გუნდის შემადგენლობაში ეს ტიტული უკვე ზედიზედ მესამედ მოიპოვა, ხოლო ხარაიშვილისთვის ის პირველია.
„ფერენცვაროშმა“ ჩემპიონატის 30-ე ტურში თავის მოედანზე „უიპეშტი“ 3:0 დაამარცხა და უმაღლესი ლიგის გამარჯვებული 32-ჯერ გახდა, რაც რეკორდული მაჩვენებელია.
დვალი „ფერენცვაროშში“ 2019 წლის იანვრიდან თამაშობს. ამ გუნდში ცენტრალურმა მცველმა 54 მატჩი ჩაატარა, გაიტანა ორი გოლი. რაც შეეხება ხარაიშვილს, შემტევი ნახევარმცველი გუნდს ამ ზამთარს შეუერთდა. მანამდე ის შვედურ „გეტებორგში“ თამაშობდა.
საქართველოს ნაკრებში დვალმა 19 მატჩი ჩაატარა, ხოლო ხარაიშვილმა – ექვსი.
