თბილისი, 27 მარტი – Sputnik. ესპანეთის ნაკრების მთავარი მწვრთნელი ლუის ენრიკე მიიჩნევს, რომ მსოფლიო-2022-ის შესარჩევი ტურნირის ფარგლებში საქართველოს წინააღმდეგ მატჩი მისი აღსაზრდელებისთვის ადვილი არ იქნება. ამის შესახებ ესპანელმა სპეციალისტმა მატჩისწინა პრესკონფერენციაზე განაცხადა.
„საქართველოს შესახებ დიდი ინფორმაცია არ გვაქვს, მხოლოდ მათი ბოლო მატჩი ვნახე. შვედებთან კარგად გამოყურებოდნენ, დაცვაში კარგად იდგნენ. ქართველები იმ თამაშში ფრეს იმსახურებდნენ. ჩვენ თამაშს რაც შეეხება, ვფიქრობ საინტერესო გამოვა, მაგრამ ადვილი არ იქნება. ვეცდებით ხვალ უკეთესად ვითამაშოთ, ვიდრე საბერძნეთთან“, - განაცხადა ენრიკემ.
პირველ მატჩში საბერძნეთის წინააღმდეგ ესპანეთმა სენსაციური ფრე დააფიქსირა - 1:1. ლუის ენრიკე ამ თემასაც შეეხო.
„ჩვენ ღრმად გავაანალიზეთ მატჩი საბერძნეთის წინააღმდეგ. მე აღვნიშნე, რა ცვლილებები უნდა შევიტანოთ და ამის მიხედვით ვმუშაობთ როგორც ინდივიდუალურად, ისე გუნდურად. რა თქმა უნდა, თამაშის ტაქტიკა დამოკიდებულია კონკრეტულ მეტოქეზე, და, პირველ მატჩთან შედარებით, ცვლილებები გვექნება. მაგრამ ახლა არ გავახმაურებ. ვფიქრობ, საქართველო გააკეთებს აქცენტს დაცვაზე, შესაბამისად, ჩვენ შეტევის ხაზის გაძლიერება მოგვიწევს“, - აღნიშნა „ფურია როხას“ თავკაცმა.
ენრიკე ასევე შეეხო იმ ფაქტს, რომ ხვალინდელი თამაში ნაწილობრივ შევსებულ სტადიონზე გაიმართება.
„ბოლო დროს შევეჩვიეთ თამაშს მაყურებლების გარეშე. მატჩის ჩატარება მაყურებლებთან ერთად და მათ გარეშე - სხვადასხვა რამეა. როდესაც ვთამაშობდით უკრაინასთან, სტადიონზე იყო 7 ათასი ქომაგი. ხვალ 15 ათასს ელოდებიან. დარწმუნებული ვარ, თამაში შესანიშნავ გარემოში გაიმართება“, - აღნიშნა ესპანელმა სპეციალისტმა.
2022 წლის მსოფლიო ჩემპიონატის შესარჩევი ციკლის პირველ ტურში საქართველოს ნაკრები გასვლაზე შვედეთთან დამარცხდა (0:1), ხოლო ესპანელებმა საკუთარ მოედანზე საბერძნეთს ვერ მოუგეს (1:1). ამგვარად, ამ დროისათვის შესარჩევ В ჯგუფში შვედეთის გუნდი ლიდერობს.
მატჩი საქართველოსა და ესპანეთს შორის 28 მარტს „დინამო-არენაზე“ გაიმართება. შეხვედრა 20:00 საათზე დაიწყება.
