თბილისი, 17 მარტი – Sputnik. თბილისში ოპოზიციური პარტია „ერთიანი ნაციონალური მოძრაობის“ ოფისზე განხორციელებული თავდასხმის ფაქტზე შინაგან საქმეთა სამინისტრომ გამოძიება დაიწყო, ნათქვამია უწყების მიერ გავრცელებულ განცხადებაში.
შემთხვევა კახეთის გზატკეცილზე მდებარე პარტიის ცენტრალური ოფისის შენობასთან დღეს, რამდენიმე საათის წინ მოხდა.
გავრცელებული ინფორმაციით, ცეცხლსასროლი იარაღიდან გასროლა ნიკა მელიას ბილბორდის მისამართით მოხდა, რომელიც პარტიის ოფისის შენობაზეა გაკრული.
სამართალდამცველი უწყების ინფორმაციით, აღნიშნულ ფაქტთან დაკავშირებით პარტიის წარმომადგენლებს შსს-სთვის არ მიუმართავთ, გამოძიება მასმედიაში გავრცელებული ინფორმაციის საფუძველზე დაიწყო.
მომხდარ ფაქტზე გამოძიება სსკ-ის 187-ე და 236-ე მუხლებით მიმდინარეობს, რაც სხვისი ნივთის დაზიანებას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
