ტელეწამყვანი თათია შარანგიას მეუღლე, ბიზნესმენი სანდრო შელია ამბობს, რომ მისი პირველი სიყვარული ცნობილი ქართველი მოდელი, „მერსედეს-ბენცის“ თბილისის მოდის კვირეულის ორგანიზატორი და შემოქმედებითი ხელმძღვანელი სოფო ჭყონია იყო.
სანდრო შელია ჟურნალ „თბილისელებთან“ ამბობს, რომ ამის შესახებ საკუთარ წიგნში „ღამის რეისი“ უფრო დაწვრილებით საუბრობს. სანდროს თქმით, წინა სასიყვარულო ურთიერთობების შესახებ მისმა მეუღლემ თათია შარანგიამ ყველაფერი იცის და ამას ყოველთვის გაგებით ეკიდებოდა და არა ეჭვიანობით.
„ჯერ ერთი გოგო, მერე მეორე, მესამე… მოეშვა, ამაზე აღარ ღელავდა და ჩვეულებრივ ამბად კითხულობდა (იცინის). მას ნამდვილად არ აქვს საეჭვიანო. რაც შეეხება სოფო ჭყონიას, ის ჩემი თანაკლასელი იყო – პირველი გოგო, რომელიც მომეწონა. მე არ ვიყავი ერთადერთი, სოფო ჭყონია ძალიან ბევრ ჩემს თანაკლასელს უყვარდა, მაგრამ ამის შესახებ არავის უთქვამს. მახსოვს მომენტი, როცა სახლში გავაცილე და მისი ხელი ხელში მეჭირა, ეს ჩემთვის ნამდვილი საოცრება იყო“, – ამბობს სანდრო შელია.
თათია შარანგია ფართო საზოგადოებამ რამდენიმე წლის წინ გაიცნო, როდესაც ის ედუარდ შევარდნაძის რძალი გახდა. მოგვიანებით კი თათია სანდრო შელიას გაჰყვა ცოლად. თათია და სანდრო რამდენიმე წელია საქართველოში ცხოვრობენ.
თათია შარანგიასა და ლაშა შევარდნაძის განქორწინების შესახებ ინფორმაცია 2013 წლის მარტის დასაწყისში გავრცელდა. გაყრის ინიციატორი თათია იყო. ხმები მათ ოჯახურ უთანხმოებაზე მანამდეც ვრცელდებოდა. ლაშა შევარდნაძესა და თათია შარანგიას ორი ვაჟი ჰყავთ – ედუარდ და ალექსანდრე შევარდნაძეები.
თათია პიანისტია. სწავლობდა თბილისში, პარიზსა და აშშ-ის სხვადასხვა ქალაქებში. მონაწილეობდა საერთაშორისო კონკურსებში. ხშირად მიემგზავრება სხვადასხვა ქვეყანაში გასტროლებზე. თათიას მშობლები თბილისში ცხოვრობენ. მას დედა ექიმი ჰყავს, მამა ბიზნესმენია.
