ერთ-ერთი პირველთაგანი, ვინც კორონავირუსზე აიცრა, დაავადებათა კონტროლის ცენტრის ხელმძღვანელის მოადგილე პაატა იმნაძეა. მან ვაქცინაცია პირდაპირ ეთერში ჩაიტარა, ათობით ტელეკამერის წინაშე. როგორც იმნაძემ აღნიშნა, საზოგადოებამ უნდა დაიჯეროს, რომ ვაქცინაციის გარეშე ინფექციის დამარცხება შეუძლებელია.
„თავს კარგად ვგრძნობ... როგორც ხედავთ, ვაქცინა გავიკეთე და ეს საშიში არ არის. პირველ დღეს 2 ათასზე მეტი მედიკოსი დარეგისტრირდა. ვიმედოვნებ, დროთა განმავლობაში კიდევ მეტი ჩემი კოლეგა დარეგისტრირდება“, – განაცხადა იმნაძემ.
მან დღევანდელ დღეს „ქვეყნისათვის მნიშვნელოვანი“ უწოდა, რადგან ზუსტად 15 მარტს საქართველოში „იწყება ეპიდემიის დასასრული“. იმნაძემ კოლეგებსა და მოქალაქეებს აცრისკენ მოუწოდა, რათა რაც შეიძლება მალე დავუბრუნდეთ ნორმალურ ცხოვრებას.
შვედურ-ბრიტანული ვაქცინის პირველი პარტია საქართველოში 13 მარტს ჩამოვიდა. 43,2 ათასი დოზა პირველ რიგში განაწილდება მედპერსონალზე. ვაქცინაცია ნებაყოფლობითია.
