თბილისი, 12 მარტი – Sputnik. საქართველოს პრემიერ–მინისტრმა ირაკლი ღარიბაშვილმა ქართველ ჩოგბურთელ ნიკოლოზ ბასილაშვილს როჯერ ფედერერთან გამარჯვება მიულოცა.
„ვულოცავ ნიკოლოზ ბასილაშვილს ლეგენდარულ ჩოგბურთელთან როჯერ ფედერერთან ისტორიულ გამარჯვებას!“, - ნათქვამია მთავრობის მეთაურის ოფიციალურ Facebook-გვერდზე გავრცელებულ მილოცვაში.
ბასილაშვილს გამარჯვება ასევე მიულოცეს თბილისის მერმა კახა კალაძემ, პარლამენტის თავმჯდომარე არჩილ თალაკვაძემ, პარტია „ქართული ოცნება – დემოკრატიული საქართველოს“ თავმჯდომარე ირაკლი კობახიძემ და სხვა ოფიციალურმა პირებმა.
საქართველოს პირველი ჩოგანი ნიკოლოზ ბასილაშვილი (АТР-ს რეიტინგში 42-ე ნომერი) დოჰას ტურნირზე სენსაციის ავტორი გახდა – მან მეოთხედფინალში შვეიცარიელი როჯერ ფედერერი (6) დაამარცხა სამ სეტში – 3:6, 6:1, 7:5.
ბასილაშვილი და ფედერერი ბოლოს ერთმანეთს ხუთი წლის წინ Australian Open-ის პირველ წრეში დაუპირისპირდნენ. ფედერერმა ქართველი ჩოგბურთელი სამ სეტში დაამარცხა – 6:2, 6:1, 6:2. ამჯერად ბასილაშვილმა რევანშის აღება შეძლო.
ბასილაშვილს ტურნირის ნახევარფინალში გასვლამ 90 რეიტინგული ქულა და 37 ათას დოლარამდე საპრიზო თანხა მოუტანა.
Qatar ExxonMobil Open–ის ფინალში გასვლისთვის ბასილაშვილი ამერიკელ ტეილორ ფრიცს (33) დაუპირისპირდება.
