თბილისი, 26 თებერვალი – Sputnik. მოყინული გზებისა და ტექნიკური მარილის დაყრის თემას კახა კალაძე ფოტოშარჟით გამოეხმაურა. თბილისის მერის „ფეისბუქის“ პირად გვერდზე გამოქვეყნდა ფოტომონტაჟი, რომელზეც კახა კალაძე ცნობილი თურქი მზარეულის ნუსრეთ გოქჩეს სტილში ყრის მარილს.
„გახარიას ლაიქებში გინდათ რომ გადაუსწროთ ხომ ? და იმიტომ შვებით ამ დამპლურ თამაშს!“, „რეკლამაა მარილის. ნეტავ ვის შემოაქვს. ფოტო სუპერ, არმანული კალოს - ბერძნულად „სილამაზეს” ნიშნავს.. თუმცა ყინულის პოდიუმზე არ გამოგვადგება“, „მიყვარს შენი იუმორი“, „კაპიტანო ამას მხოლოდ შენ თუ მოიფიქრებდი“, „ ვაკეში რომ გვეცხოვრა იოდიზირებულ მარილს მოაყრიდნენ“, – უწერენ მერს კომენტარებში.
ორი დღის წინ „ფეისბუქზე“ გავრცელდა კადრები, სადაც ჩანს, რომ მელიქიშვილის ქუჩაზე ტექნიკურ მარილს ხელით ყრიან „თბილსერვის ჯგუფის“ თანამშრომლები.
კომპანიამ ამის გამო განცხადებაც გაავრცელა, სადაც აღნიშნული იყო რომ, ყველა ქუჩასა და ტროტუარზე, მიწისქვეშა გადასასვლელებსა და მეტროს სადგურების ჩასასვლელებში, ასევე საფეხმავლო ხიდებზე ვერ მოძრაობს სპეციალური ტექნიკა და ასეთ ადგილებში მარილი იყრება ნიჩბით ან ხელით.
