თბილისი, 24 თებერვალი – Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა საბაჟო საზღვარზე დიდი ოდენობით საქონლის გადაადგილებასთან დაკავშირებული წესის დარღვევის ფაქტზე საქართველოს მოქალაქე დააკავეს, ნათქვამია უწყების მიერ გავრცელებულ განცხადებაში.
გამოძიებით დადგინდა, რომ ბრალდებულს გერმანიაში შეძენილი მსუბუქი ავტომანქანის სალონში სპეციალურად მოწყობილ სამალავებში განთავსებული ჰქონდა სხვადასხვა სახის საქონელი. მათ შორის – ძვირადღირებული საათები, ტყავის ნაწარმი, ბიჟუტერია და სხვ.
„ბრალდებულმა უკანონო მატერიალური სარგებლის მიღების მიზნით ავტომანქანა საქართველოში ბათუმის პორტის გავლით შემოიყვანა და არ დაადეკლარირა მასში არსებული საქონელი“, – ნათქვამია განცხადებაში.
ამ ეტაპზე მიღებული ექსპერტიზის დასკვნით, ავტომანქანაში აღმოჩენილი საათების საბაჟო ღირებულება შეადგენს 11.745 ლარს, ხოლო დანარჩენ საქონელზე კიდევ დანიშნულია ექსპერტიზა.
მომხდარ ფაქტზე გამოძიება სსკ-ის 214-ე მუხლის პირველი ნაწილით მიმდინარეობს.
