თბილისი, 13 თებერვალი — Sputnik. ზღვის ძლიერი ღელვის შედეგად ახალ ბულვარში ერთ კილომეტრიან მონაკვეთზე სასეირნო ბილიკი ქვა-ღორღით დაიფარა, იუწყება აჭარის ტელევიზია.
გავრცელებული ინფორმაციით, ტერიტორიაზე დილიდან გაწმენდითი სამუშაოები მიმდინარეობდა. ადგილზე სანიტარული დასუფთავების სამსახურის თანამშრომლები მუშაობენ.
როგორც გარემოსდამცველმა კახა გუჩმანიძემ განაცხადა, ახალ ბულვარში ნაპირსამაგრი სამუშაოების ჩატარების მიუხედავად პრობლემა კვლავ მოუგვარებელი დარჩა. სანიტარული დასუფთავების სამსახურის უფროსი კი ამბობს, რომ ნაპირდაცვითი სამუშაოები სხვა ტერიტორიაზე ჩატარდა და ეს შემთხვევა მასთან კავშირში არ არის.
მანამდე, ძლიერი შტორმის შედეგად ფოთში, კუნძულის უბნის სანაპირო დაიტბორა. ზღვის ღელვა 4-5 ბალს აღწევდა.
