თბილისი, 10 თებერვალი - Sputnik. ბერძნულ-რომაულ ჭიდაობაში ევროპის ვიცე-ჩემპიონი იური ლომაძე საპატიმროდან დღეს, 10 თებერვალს გაათავისუფლეს, იუწყება პირველი არხი.
ვიცე-ჩემპიონთან ერთად მისი ძმა, ფეხბურთელი ლაშა ლომაძე და მათი სამი ბიძაშვილიც გაათავისუფლეს. დაკავებულებს ამ ეტაპისათვის შინა პატიმრობა მიესაჯათ.
იური ლომაძე, მისი ძმა და ბიძაშვილები 7 თვის წინ ადამიანის გატაცებისა და თავისუფლების უკანონო აღკვეთის ბრალდებით დააკავეს.
გამოძიების მიხედვით, ქალაქ ბათუმში, ბრალდებულებმა 32 წლის მამაკაცი შურისძიების მოტივით, ძალის გამოყენებით ჩასვეს ავტომობილში, წაიყვანეს ოზურგეთის მუნიციპალიტეტის სოფელ ბოხვაურში, ერთ-ერთი მოქალაქის საცხოვრებელ სახლში, სადაც ფიზიკურად გაუსწორდნენ.
