თბილისი, 5 თებერვალი – Sputnik. ავტობუსის ზოლში, მუნიციპალური ტრანსპორტის გარდა, სხვა სატრანსპორტო საშუალებების გადაადგილება 7 თებერვლიდან იკრძალება, განაცხადა თბილისის ვიცე-მერმა ირაკლი ხმალაძემ.
25 დეკემბრიდან კერძო სატრანსპორტო საშუალებებს მოძრაობა დედაქალაქში არსებულ ე.წ. ბასლეინებზეც შეეძლოთ. მერიამ მაშინ აღნიშნული გადაწყვეტილება ქალაქში კერძო ავტომობილების სიმრავლის გამო მიიღო, რაც მუნიციპალური ტრანსპორტის მუშაობის დროებით შეჩერებამ გამოიწვია.
ვიცე-მერის განცხადებით, მუნიციპალური ტრანსპორტის მუშაობა 8 თებერვლიდან აღდგება, რის გამოც კერძო სატრანსპორტო საშუალებები ე.წ. ბასლეინზე ვეღარ ივლიან, წესის დამრღვევ პირებს კი ადმინისტრაციული ჯარიმა დაეკისრებათ.
თბილისში საზოგადოებრივი ტრანსპორტი 21:00 საათამდე იმუშავებს. ხმალაძის განცხადებით, სატრანსპორტო კომპანიების იმ თანამშრომლების სახლებში ტრანსპორტირებას, რომლებიც 21:00 საათზე დაასრულებენ მუშაობას, თბილისის მერია უზრუნველყოფს.
ავტობუსებში, მიკროავტობუსებსა და მეტროს სადგურებში მკაცრად გაკონტროლდება პირბადის ტარების წესი. ავტობუსი არ დაიძვრება, თუ ყველა მგზავრი არ დაიცავს უსაფრთხოების ზომებს.
