ოპოზიციონერი დეპუტატი პარლამენტის ვიცე–სპიკერი გახდა

თბილისი, 4 თებერვალი – Sputnik. ოპოზიციური პარტია „მოქალაქეების“ წევრმა ლევან იოსელიანმა საქართველოს პარლამენტის ვიცე–სპიკერის თანამდებობა დაიკავა.

მის კანდიდატურას მხარი 87-მა დეპუტატმა დაუჭირა.

იოსელიანი ვიცე–სპიკერის თანამდებობაზე ოპოზიციის კვოტიდან აირჩიეს. უფრო ადრე პარლამენტის თავმჯდომარის მოადგილის პოსტი ოპოზიციიდან „ევროპელი სოციალისტების“ წევრმა ავთანდილ ენუქიძემ დაიკავა. ამგვარად, ექვსი ოპოზიციონერი დეპუტატიდან ორს სპიკერატში მაღალი თანამდებობა უკავია.

ალეკო ელისაშვილის პარტია „მოქალაქეებმა“ არჩევნებზე ამომრჩეველთა 25,5 ათასი ხმა მიიღო და პარლამენტში ორი მანდატი მოიპოვა.

ამჟამად საკანონმდებლო ორგანოში 60 ოპოზიციური ადგილიდან მხოლოდ ექვსია დაკავებული – ოთხია „საქართველოს პატრიოტთა ალიანსის“ სიით გასული, რომლებმაც შემდეგ თავიანთი პარტია „ევროპელი სოციალისტები“ შექმნეს, და ორი – „მოქალაქეების“ წარმომადგენელი.

პარლამენტის თავმჯდომარის მეოთხე მოადგილედ ავთანდილ ენუქიძე აირჩიეს>>

დანარჩენი ოპოზიციონერები, რომლებიც პარლამენტში გავიდნენ, ბოიკოტს აცხადებენ და მანდატებზე უარს ამბობენ.