თბილისი, 22 იანვარი — Sputnik. საქართველოს მთავრობა მომავალ კვირას ქვეყანაში შემოსვლის წესების ლიბერალიზაციაზე იმსჯელებს, განაცხადა საქართველოს ეკონომიკის მინისტრმა ნათია თურნავამ ტელეკომპანია „იმედის“ ეთერში.
დღეს უწყებათაშორისმა საკოორდინაციო საბჭომ ქვეყანაში მოქმედი შეზღუდვების ეტაპობრივი მოხსნის გეგმა დაამტკიცა, რომლის მიხედვით 1 თებერვლიდან ზოგი რეგულაცია შემსუბუქდება. დღესვე ცნობილი გახდა, რომ საქართველო რეგულარულ ავიამიმოსვლას 1 თებერვლიდან ყველა მიმართულებით აღადგენს.
თურნავას განცხადებით, რადგანაც ქვეყანაში ეტაპობრივად გაიხსნება ბიზნესი, ჩნდება შესაძლებლობა, ტურისტებსაც ვუმასპინძლოთ.
„ეს არ უნდა იყოს ერთიანი დარტყმა ჩვენი ეპიდვითარებისთვის, მაგრამ იმის გათვალისწინებით, რომ ევროპაში უკვე ტემპს იკრებს ვაქცინაცია, საკმაოდ დიდი მოთხოვნაა ვაქცინირებული ტურისტების მოგზაურობისა. ეს ადამიანები უფრო თამამად მოგზაურობენ. აქედან გამომდინარე ჩვენ ვფიქრობთ, რომ ტურისტების პირველი ჯგუფები ქვეყანაში გაზაფხულზე შემოვლენ“, — განაცხადა მინისტრმა.
მისი თქმით, საქართველო ტურისტებს გახსნილ სასტუმროებსა და სარესტორნო ბიზნესს დაახვედრებს.
ღამის საათებში გადაადგილებაზე შეზღუდვა 1 მარტამდე გახანგრძლივდა
აღსანიშნავია, რომ ტურისტული სექტორი, რომელშიც დაახლოებით 150 ათასი ადამიანია დასაქმებული, კორონავირუსის პანდემიის გამო ყველაზე მეტად დაზარალდა. ამიტომ ამ სფეროსა და ტურიზმთან დაკავშირებული დარგების დახმარება საქართველოს მთავრობის პრიორიტეტულ მიმართულებად იქცა.
