თბილისი, 22 დეკემბერი – Sputnik. მომღერალ ნინი შერმადინს დედა გარდაეცვალა. ამის შესახებ სოციალური ქსელიდან ხდება ცნობილი.
„ნეტა კიდევ როდის შევხდებით? ძალიან მომენატრებით. ასე ორივემ როგორ დამტოვეთ მარტო, ასე უთქმელად. ძალიან მიყვარხართ. შევხდებით მარადისობაში“, – დაწერა მომღერალმა.
ნინი შერმადინს მამა აპრილში გარდაეცვალა. როგორც ინტერვიუებში ამბობდა, მას მეოთხე სტადიის ფილტვის სიმსივნე გარდაცვალებამდე რამდენიმე თვით ადრე დაუდგინეს. „ქრისტიანებს გვჯერა, რომ ოდესმე შევხვდებით ერთმანეთს. მე ისედაც მიჩვეული ვიყავი გადახვეწილ ცხოვრებას. არავის ვუსურვებ იგივე გამოიაროს. მარტში ჩამოვედი, მოვასწარი მამაჩემის ნახვა. ძალიან იმედიანად დამემშვიდობა: აი, რომ ჩამოხვალ, ნახავ, რა კარგად დაგვხდებიო. იცოდა, რაც სჭირდა, მაგრამ მთელ ორგანიზმზე თუ ჰქონდა მოდებული, ეს – არა. ჩემი წამოსვლიდან ერთ თვეში გარდაიცვალა“, – აცხადებდა მომღერალი.
ნინი შერმადინი წლებია აშშ-ში ცხოვრობს და მუშაობს. საქართველოში საკმაოდ იშვიათად ჩამოდის. მომღერალი ამერიკაში ერთ-ერთ ბანკშია დასაქმებული, თუმცა პარალელურად სიმღერისთვისაც იცლის ხოლმე.
ცნობილ ქართველ მომღერალს ნინი შერმადინს თინეიჯერი შვილი ჰყავს. გოგონას მარიამ ციცაგი ჰქვია. ის თბილისში ნინის მშობლებთან ერთად იზრდებოდა. შერმადინი ამერიკაში 8 წლის წინ გაემგზავრა. ახლა მან შვილის საბუთების მომზადება გადაწყვიტა, აპირებს მარიამის შტატებში წაყვანას, რათა გოგონამ სკოლა იქ დაამთავროს.
