თბილისი, 11 დეკემბერი – Sputnik. ოპოზიციის ბოიკოტი – ეს არის ბოიკოტი საკუთარი ამომრჩევლისა და ხალხის და არა „ქართული ოცნების“ მიმართ“, განაცხადა „ქართული ოცნების“ წევრმა ბექა ოდიშარიამ ტელეკომპანია „იმედის“ ეთერში.
მეათე მოწვევის პარლამენტის სხდომას, რომელიც დღეს გაიხსნა, 150-დან ესწრება 88 დეპუტატი – მხოლოდ „ქართული ოცნების“ წარმომადგენლები. სხდომათა დარბაზში ოპოზიციონერი დეპუტატების ადგილები თავისუფალია. პარლამენტში მოხვედრილი რვავე ოპოზიციური პარტია 31 ოქტომბრის არჩევნების შედეგებს არ აღიარებს და რიგგარეშე არჩევნებს მოითხოვს.
ბექა ოდიშარია მიიჩნევს, რომ პარლამენტი არის ის ადგილი, რომელიც იძლევა უმწვავესი პოზიციების დაფიქსირების და მასზე პასუხების მოსმენის საშუალებას.
„მინდა ვიფიქრო, რომ ოპოზიციის იმ ნაწილში, რომელიც დღეს პარლამენტში არ იმყოფება, საღი აზრი გაიმარჯვებს და მაინც მოახერხებენ თავისი წარმომადგენლობის დასწრებას პარლამენტში, რაც ძალიან მნიშვნელოვანია“, – აღნიშნა ოდიშარიამ.
მისი თქმით, ყველა ნორმალურ ქვეყანას სჭირდება პარლამენტში ნორმალური ოპონირება.
„ძირითად ინსტიტუციაში ოპონირების გარეშე ყოფნა, რა თქმა უნდა, უხერხულობაა და სწორედ ამიტომ, ვფიქრობ, ვდგამთ იმ კონკრეტულ ნაბიჯებს, რომლებიც კონკრეტულ მოცემულობას შეესატყვისება და არ ვიშურებთ ძალისხმევას, რომ კიდევ ერთხელ მოვუწოდოთ ოპოზიციას, დაიკავონ ადგილები პარლამენტში“, – განაცხადა ბექა ოდიშარიამ.
ოდიშარიას თქმით, „ამაზე საუბრობენ ელჩები, საპატრიარქო, ერი და ბერი“.
საქართველოს პარლამენტში არჩევნების შედეგად რვა ოპოზიციური პარტია მოხვდა, რომლებმაც არსებული 150-დან 60 ადგილი გადაინაწილეს. ბოლო დრომდე ისინი მმართველი პარტია „ქართული ოცნების“ წინააღმდეგ ერთიანი ფრონტით იბრძოდნენ, პარლამენტში შესვლაზე უარს აცხადებდნენ და რიგგარეშე არჩევნების ჩატარებას ითხოვდნენ. ოპოზიციური პარტიის ლიდერთაგან პირველი, ვინც ოპოზიციაში შესაძლო განხეთქილებასა და ბოიკოტის გადაწყვეტილების შეცვლაზე განცხადება გააკეთა, პარტია „მოქალაქეების“ ლიდერი ალეკო ელისაშვილი გახდა.
დღესვე პარლამენტის სხდომის პარალელურად ოპოზიციური პარტიების წარმომადგენლებმა მოსწავლე ახალგაზრდობის სასახლის ბაღში სადეპუტატო მანდატებზე უარი საჯარო განცხადებაზე ხელმოწერით დააფიქსირეს.
აღნიშნულ მემორანდუმს ხელი არ მოაწერა პარლამენტში შესულმა ოთხმა ოპოზიციურმა პარტიამ: „გირჩმა“, „რესპუბლიკურმა პარტიამ“, „საქართველოს პატრიოტთა ალიანსმა“ და „მოქალაქეებმა“. მიუხედავად ამისა, ისინი ბოიკოტის რეჟიმში რჩებიან.
„რესპუბლიკურმა პარტიამ“, რომელიც შედის ბლოკში „ერთიანი ნაციონალური მოძრაობა – ძალა ერთობაშია“, განაცხადა რომ ოპოზიციასა და „ქართულ ოცნებას“ შორის მოლაპარაკებების დასრულებას დაელოდება.
