საქართველოს უმაღლეს საკანონმდებლო ორგანოსთან პარასკევს დილიდან შეიკრიბნენ მომიტინგეები, რომლებიც ანტისამთავრობო ლოზუნგებს სკანდირებდნენ და შენობაში შემსვლელებს შეძახილებით აცილებდნენ.
ოპოზიციის მომხრეები იმყოფებოდნენ პარლამენტის ყველა შესასვლელთან, მათ შორის გვერდითა ჭიშკართან, სადაც დეპუტატებისა და მთავრობის წევრების ავტომობილები ეზოში შედიან. იქვე ოპოზიციამ გამართა პირველი აქცია „დემოკრატიის დაკრძალვა“. მოგვიანებით ლეიბორისტული პარტიის მხარდამჭერებმა ზედა შესასვლელთან სამგლოვიარო გვირგვინებიც მიიტანეს.
