თბილისი, 7 დეკემბერი – Sputnik. მოვუწოდებ მოსახლეობას, ისარგებლონ შეთავაზებით და სიმპტომების არსებობის შემთხვევაში ანტიგენზე დაფუძნებული სწრაფი ტესტი ჩაიტარონ, განაცხადა საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ ბრიფინგზე.
საქართველოში მიზნობრივი წერტილოვანი შეზღუდვების ორთვიანი კონკრეტული გეგმის ფარგლებში უკვე დაიწყო ინტენსიური ტესტირება, რომელიც სახელმწიფოს მიერ დღეში 20 000 ტესტის ჩატარებას გულისხმობს. განსაკუთრებით ფართოვდება ანტიგენზე დამყარებული სწრაფი ტესტების გამოყენება, რომლის პასუხის მიღებაც შესაძლებელი იქნება ტესტის ჩატარებიდან 20 წუთის განმავლობაში.
გამყრელიძის განცხადებით, ანტიგენზე დაფუძნებული სწრაფი ტესტი თბილისში 42 ამბულატორიულ, ხოლო მთელი საქართველოს მასშტაბით დაახლოებით 150-ზე მეტ სამედიცინო დაწესებულებაშია ხელმისაწვდომი.
„სწრაფი ტესტის ჩატარება მოსახლეობისთვის უფასოა. კორონავირუსის სიმპტომების მქონე მოქალაქეებს შეუძლიათ შესაბამის სამედიცინო დაწესებულებებს მიმართონ როგორც ექიმის დანიშნულებით, ისე თვითდინებით. მოსახლეობის ტესტირების ხარჯებს სახელწიფო ანაზღაურებს“, – აღნიშნა გამყრელიძემ.
ეპიდემიოლოგი მოქალაქეებს კორონავირუსის გავრცელების მიზნით დაწესებული რეკომენდაციების სრული დაცვისკენ მოუწოდებს. მისი თქმით, დაწესებული შეზღუდვების პერიოდში თუ მოსახლეობა რეკომენდაციებს მაქსიმალურად დაიცავს, შესაძლოა, თვის ბოლოსთვის ინფიცირების შემთხვევების რაოდენობა განახევრდეს.
„მნიშვნელოვანია, რომ შეზღუდვების პირობებში მაქსიმალურად გავაფართოოთ კორონავირუსის გამოვლენის მაჩვენებელი. თუ ყველანი შევასრულებთ დაწესებულ რეკომენდაციებს, შეიძლება ქვეყანაში ვირუსის გავრცელების ქვესვლის სერიოზული ტენდენცია შეიქმნას, აპრილისთვის კი დღიური მაჩვენებელი, შესაძლოა, 200-ის ფარგლებში ჩამოვიდეს“, – განაცხადა გამყრელიძემ.
ქვეყანაში კორონავირუსის პანდემის დაწყებიდან დღემდე გამოვლენილი დადასტურებული შემთხვევების საერთო რაოდენობამ 164 ათასს გადააჭარბა, ვირუსი დაამარცხა 137 ათასზე მეტმა ადამიანმა.
საქართველოში ეპიდვითარების გაუარესების გამო ხელისუფლებამ კორონავირუსთან ბრძოლის ორთვიანი გეგმა დაამტკიცა, რომლის თანახმად, ამ პერიოდში რიგი შეზღუდვები დაწესდა. შეზღუდვები 28 ნოემბრიდან 31 იანვრის ჩათვლით პერიოდში იმოქმედებს.
