რა პროგნოზი აქვს ამირან გამყრელიძეს ახალი კორონავირუსით ინფიცირებულთა რაოდენობასთან დაკავშირებით
„დღეს შემცირება რეალურად გვაქვს, მაგრამ ეს იმის ხარჯზეა, რომ ბოლო 24 საათში მხოლოდ 10 ათასამდე ტესტი გაკეთდა. თუ ჩვენ გვექნება 20 ათასამდე ტესტი, ინფიცირებულების მეტი რაოდენობის გამოვლენა მოხდება. მაგრამ ეს გაიზრდება ძირითადად მსუბუქი და უსიმპტომო პაციენტების ხარჯზე. თუმცა სწორედ მათი იზოლირება ბინაზე თუ კოვიდ–სასტუმროებში მოგვცემს ამ ჯაჭვის შემსუბუქების საშუალებას“, – განაცხადა ამირან გამყრელიძემ.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 2.501-ით გაიზარდა და ინფიცირებულთა საერთო რიცხვმა 164.976-ს მიაღწია.
ქვეყანაში ინფიცირებულთა ზრდის მაჩვენებლის შეკავების მიზნით ხელისუფლებამ 28 ნოემბრიდან რიგი შეზღუდვები დააწესა, ყველაზე სერიოზული შეზღუდვები შვიდ დიდ ქალაქში მოქმედებს – არ მუშაობს მუნიციპალური ტრანსპორტი, დაიკეტა სავაჭრო ცენტრები, ბაზრობები (გარდა აგრარული ბაზრისა), ფიტნეს–დარბაზები და აუზები და ა.შ. გარდა ამისა, ქვეყნის მთელ ტერიტორიაზე 21:00 საათიდან 05:00 საათამდე იკრძალება ქუჩაში როგორც ქვეითების, ისე ტრანსპორტის გადაადგილება.
