თბილისი, 7 დეკემბერი — Sputnik. ავტორიტეტულმა ამერიკულმა გამოცემა Finencial Times-მა 2020 წლის ყველაზე გავლენიანი ქალების სია გამოაქვეყნა.
ჩამონათვალში 12 ქალია შესული და, როგორც გამოცემა აღნიშნავს, ყველა მათგანი კრიზისებთან ბრძოლითა და პრობლემებზე ყურადღების გამახვილებით არის გამორჩეული.
We asked you to nominate women from across the globe who you think have been game-changers in 2020 – and here's what you said: https://t.co/4QDr4ZhcrN
— Financial Times (@FinancialTimes) December 5, 2020
აღსანიშნავია, რომ რედაქციამ კანდიდატები მკითხველთა დახმარებით შეარჩია, რომელთა კომენტარებიც არის მოყვანილი არჩევანის განმარტებაში.
რეიტინგში პირველ პოზიციას ახალი ზელანდიის პრემიერ-მინისტრი ჯასინდა არდერნი იკავებს — კორონავირუსის საფრთხეზე ოპერატიული რეაგირებისთვის.
შემდეგ მოდის ოზლემ ტურეჩი — კომპანია Biontech-ის წამყვანი მეცნიერი, რომელმაც კორონავირუსის ვაქცინა შეიმუშავა.
მესამე ადგილზე მოხვდა კამალა ჰარისი, რომელიც აშშ-ის ვიცე-პრეზიდენტის პოსტს დაიკავებს ჯო ბაიდენის ადმინისტრაციაში.
მას მოჰყვებიან ბელორუსი ოპოზიციონერი სვეტლანა ტიხანოვსკაია — „ქვეყნის პოლიტიკური ძილიდან გამოყვანისა და ადამიანებისთვის იმედის მიცემისთვის“ და ამერიკელი პოლიტიკოსი სტეისი აბრამსი, რომელმაც დემოკრატების წარმატებული კამპანია ჩაატარა ჯორჯიის შტატში.
საინტერესოა ის ფაქტი, რომ შემდეგ პოზიციაზე განთავსდნენ დასაქმებული დედები — არა რომელიმე კონკრეტული ქალი, არამედ ყველა დედა, რომლებიც პანდემიის გამო დაკეტილი საბავშვო ბაღების მიუხედავად მაინც ახერხებენ მუშაობას.
რეიტინგში ასევე შევიდნენ ტაივანის პრეზიდენტი ცაი ინგ ვენი, რომელმაც ქვეყნის ეკონომიკა ერთ-ერთ უძლიერესად აქცია მიმდინარე წელს, გერმანიის კანცლერი ანგელა მერკელი, აშშ-ის უმაღლესი სასამართლოს მოსამართლე რუთ გინზბურგი, ამერიკელი პოლიტიკოსი ალექსანდრა ოკასიო–კორტესი, ინდოეთის ჯანდაცვის მინისტრი შაილაი და ამერიკელი მომღერალი ტეილორ სვიფტი.
