თბილისი, 5 დეკემბერი - Sputnik. პოლიციის თანამშრომლებმა თბილისში დააკავეს ორი პირი, რომლებიც კანონიერი ქურდის ბორია აფაქელას სახელით ბიზნესმენს ფულად თანხას სძალავდნენ, ნათქვამია შსს-ს ვებგვერდზე გავრცელებულ განცხადებაში.
გამოძიებამ დაადგინა, რომ დაკავებულები კანონიერი ქურდის სახელით თეთრიწყაროში მოღვაწე ბიზნესმენს ქურდული სამყაროს სასარგებლოდ 10 ათასი დოლარის გადახდას აიძულებდნენ. ბიზნესმენს იარაღის დემონსტრირებით დაემუქრნენ, რომ მოთხოვნილი თანხის გადაუხდელობის შემთხვევაში, მას ძალის გამოყენებით გადაიყვანდნენ თურქეთის რესპუბლიკაში, ე.წ. „კანონიერ ქურდთან“ საქმის გარჩევის მიზნით, ნათქვამია განცხადებაში.
პოლიციის თანამშრომლებმა ორივე პირი თბილისის ცენტრალურ რაიონში მას მერე დააკავეს, რაც ბიზნესმენმა მათ მოთხოვნილი თანხის ნახევარი გადასცა.
პოლიციამ, დაკავებულების ავტომანქანის ჩხრეკისას, 5 000 აშშ დოლარი, ხოლო დროებითი საცხოვრებელი სახლიდან - 2 ცეცხლსასროლი პისტოლეტი, 2 მჭიდი და 13 საბრძოლო ვაზნა ნივთმტკიცებად ამოიღო. სამართალდამცველებმა, ასევე, ნივთმტკიცების სახით ამოიღეს დაკავებულების მობილური ტელეფონები, რომელთა საშუალებითაც ისინი საზღვარგარეთ მცხოვრებ ქართველ „კანონიერ ქურდს“ უკავშირდებოდნენ.
ამჯერად „ქურდული სამყაროს“ წევრობას, ასევე, ჯგუფურად ჩადენილი ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარებისთვის მათ 7-დან 11 წლამდე პატიმრობა ემუქრებათ.
