პლასტიკურმა ქირურგმა კოტე მათითაშვილმა, რომელმაც შემოქმედებითი პაუზა აიღო, ჟურნალ „თბილისელებთან” ინტერვიუში განაცხადა, რომ რამდენიმე თვეა ძველი ცხოვრება დაივიწყა, ალკოჰოლს აღარ მოიხმარს და მიხვდა, რომ ადამიანმა ფხიზლად უნდა იცხოვროს.
„აქამდე მოვიხმარდი ალკოჰოლს და მეგონა, რომ ყველაფერი კარგად იყო. როცა მივხვდი, რომ ეს უნდა დამთავრებულიყო, დამთავრდა. გამოვფხიზლდი, გავიღვიძე და ახალი და ბედნიერი რეალობა დავინახე. ალკოჰოლს განსაკუთრებულად დიდი დოზით არ მოვიხმარდი, არც მიჯაჭვული ვყოფილვარ მასზე. უბრალოდ, მივხვდი, რომ ადამიანმა ტოტალურად ფხიზლად უნდა იცხოვრო“, – განაცხადა მათითაშვილმა.
მისი თქმით, თრობა და დესტრუქციული ქმედებები არც აქამდე ახასიათებდა, მაგრამ ახლა მიხვდა, რომ ნებისმიერ საშუალებაზე დამოკიდებულება მარაზმია, რეალობა ისეთი უნდა მიიღო, როგორიც არის. ორი გზა არსებობს: პირველი – არდალევა, ესაა გზა ჯოჯოხეთიდან გასაქცევად. მეორე – ფხიზელი ცხოვრება, ესაა სამოთხისკენ გზა, რომელიც მან აირჩია.
ცნობილი პლასტიკური ქირურგი კოტე მათითაშვილი ორი წლის წინ მეორედ დაქორწინდა. მისი რჩეული დიზაინერი ეკა ბალანჩივაძეა. ქორწინების შემდეგ წყვილმა თაფლობის თვე თურქეთში გაატარა. თანაცხოვრების დაახლოებით ერთი წლის თავზე, ივნისში მათ ურთიერთობას ოფიციალური სახე მისცეს და ხელი მოაწერეს.
კოტე მათითაშვილი განსაკუთრებით პოპულარული გადაცემა „ექიმებში“ გამოჩენის შემდეგ გახდა. ის დამსახურებულად იკავებს ერთ-ერთი სიმპათიური ექიმი მამაკაცის წოდებას და რეიტინგებშიც ხშირად ხვდება. პირველი ქორწინებიდან ორივეს ჰყავს შვილები.
