თბილისი, 2 დეკემბერი - Sputnik. ჯანდაცვის ყოფილმა მინისტრმა, დავით სერგეენკომ კლინიკა TIM-ის კოვიდ განყოფილებაში მოხალისედ იმუშავა, ამის ამსახველი ვიდეო სოციალურ ქსელში თბილისის მედიცინის ინსტიტუტმა გამოაქვეყნა.
ვიდეოში ჩანს, როგორ მორიგეობს ჯანდაცვის ყოფილი მინისტრი კლინიკა „თიმის" კოვიდ განყოფილებაში და კოლეგებს პაციენტების მოვლის პროცესში ეხმარება.
გავრცელებული ინფორმაციით, ყოფილი მინისტრი და ამჟამად უკვე მეათე მოწვევის პარლამენტის დეპუტატი საავადმყოფოში მთელი დღის განმავლობაში მორიგეობდა.
ამ დროისთვის საქართველოში კორონავირუსით ინფიცირებული მედიკოსების რაოდენობა 8 ათასს აღემატება. გარდაცვლილია სამედიცინო სფეროს ათზე მეტი წარმომადგენელი.
საქართველოში კორონავირუსის მეორე ტალღა მძვინვარებს. ინფიცირების დღიური მაჩვენებელი 4 ათასს აღწევს. კორონავირუსით გამოწვეული გართულებების შედეგად ქვეყანაში 1 342 ადამიანი გარდაიცვალა.
