თბილისი, 28 ნოემბერი - Sputnik. ქუთაისში კორონავირუსით ეპიდემიოლოგი, დაავადებათა კონტროლის ცენტრის თანამშრომელი ლია შეყილაძე გარდაიცვალა. ინფორმაციას ტელეკომპანია „რუსთავი 2“ ავრცელებს.
არსებული ინფორმაციით, 62 წლის ლია შეყილაძე ქუთაისში ექიმების მეთვალყურეობის ქვეშ იმყოფებოდა. მას კოვიდინფექცია რამდენიმე დღის წინ დაუდასტურდა.
ბოლო პერდიოდში მისი ჯანმრთელობის მდგომარეობა დამძიმდა და ექიმებმა მისი სიცოცხლის გადარჩენა ვერ შეძლეს.
შეგახსენებთ, იმერეთში ბოლო 24 საათის განმავლობაში კორონავირუსის 662 ახალი შემთხვევა დადასტურდა.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 4 472-ით გაიზარდა და ინფიცირებულთა საერთო რიცხვმა 127 942-ს მიაღწია.
ამ დროისათვის სულ გამოჯანმრთელდა 106 328 ადამიანი (ბოლო 24 საათში - 4 058), გარდაიცვალა – 1 195 (ბოლო 24 საათში - 34)
საქართველოში კორონავირუსის პირველი შემთხვევა 26 თებერვალს დაფიქსირდა.
