თბილისი, 29 ოქტომბერი — Sputnik. ევროპაში გამალებული სარაკეტო შეიარაღება კონფრონტაციის პოტენციალს ზრდის, განაცხადა რუსეთის ელჩმა ვაშინგტონში ანატოლი ანტონოვმა.
ასეთი კომენტარით უპასუხა დიპლომატმა ეროვნული უშიშროების საკითხებში აშშ-ის პრეზიდენტის მრჩეველის რობერტ ო’ბრაიენის ოთხშაბათის განცხადებას, რომ ვაშინგტონი მზადაა, რუსეთის შესაკავებლად ევროპაში ჰიპერბგერითი იარაღი და ბალისტიკური რაკეტები განათავსოს.
„ასეთი განზრახვა რეგიონულ და გლობალურ უშიშროებაში დისბალანსის საფრთხეს აჩენს და კონფრონტაციული პოტენციალის ზრდისკენ მივყავართ <...> თუ ვაშინგტონი მართლაც დაინტერესებულია „შეიარაღებაზე რეალური კონტროლით“, ამისათვის ევროპის კონტინენტზე სარაკეტო შეიარაღების გამალებული ზრდის ესკალაცია აუცილებელი არ არის “, — ნათქვამია ანტონოვის კომენტარში, რომელსაც საელჩო საკუთარ Facebook-გვერდზე აქვეყნებს.
მან „კონსტრუქციულ ალტერნატივად“ შეაფასა რუსეთის პრეზიდენტ ვლადიმირ პუტინის წინადადება, რომელიც მცირე და საშუალო სიშორის რაკეტების შესახებ ხელშეკრულების შეწყვეტის პირობებში დეესკალაციისკენ არის მიმართული.
„რუსეთი მზადაა უცხოელ პარტნიორებთან ერთობლივი ძალისხმევისთვის, რათა ევროპის კონტინენტზე და მსოფლიოს სხვა რეგიონებში ახალი გამალებული სარაკეტო შეიარაღება აღიკვეთოს“, — დაასკვნა ანტონოვმა.
საშუალო და მცირე სიშორის რაკეტების შესახებ ხელშეკრულებამ, რომლის მიზანიც გლობალური სტრატეგიული სტაბილურობის უზრუნველყოფა იყო, 2019 წლის 2 აგვისტოს შეწყვიტა მოქმედება, ვინაიდან აშშ ხელშეკრულებიდან გავიდა. ეს ნაბიჯი ვაშინგტონმა იმით ახსნა, რომ მოსკოვი ვალდებულებებს არ ასრულებდა. კერძოდ, შეერთებულმა შტატებმა რუსეთი შეთანხმებით აკრძალული რაკეტა 9М729-ის შექმნა–გამოცდაში დაადანაშაულა, მოსკოვში კი ირწმუნებიან, რომ რაკეტის მოქმედების რადიუსი არ აღემატება დასაშვებ 500 კმ-ს.
გასულ ორშაბათს პრეზიდენტმა ვლადიმირ პუტინმა განაცხადა, რომ მოსკოვი მზადაა ნებაყოფლობით თქვას უარი რუსეთის ევროპულ ნაწილში რაკეტა 9М729-ის განთავსებაზე, ოღონდ იმ პირობით, რომ ნატო ასევე გადადგამს შემხვედრ ნაბიჯებს. გარდა ამისა, მან ასევე შესთავაზა ალიანსს, შემოწმდეს Aegis Ashore-ს კომპლექსები ევროპის ბაზებზე და ასევე 9М729-ები კალინინგრადის ობიექტებზე.
თუმცა ევროპაში რუსეთის ლიდერის ინიციატივას სკეპტიკურად შეხვდნენ. კერძოდ, ბერლინში აღნიშნეს, რომ ასეთი იდეეები „ნდობას არ იმსახურებს“. ლონდონმა კი კიდევ ერთხელ დაადანაშაულა რუსეთი საშუალო და მცირე სიშორის რაკეტების ლიკვიდაციის შესახებ შეთანხმების ჩავარდნაში.
