თბილისი, 26 ოქტომბერი – Sputnik. 1 აგვისტოდან 25 ოქტომბრამდე პერიოდში საქართველოდან 7 684 ტონა თხილის ექსპორტი განხორციელდა, რომლის ღირებულებამ 41.6 მლნ აშშ დოლარი შეადგინა, იუწყება გარემოს დაცვისა და სოფლის მეურნეობის სამინისტრო.
უწყების ცნობით, აღნიშნულ პერიოდში განხორციელებული თხილის ექსპორტის მოცულობა 2 252 ტონით – 41%-ით აღემატება 2019 წლის ანალოგიურ პერიოდში განხორციელებული ექსპორტის მაჩვენებელს, ხოლო ღირებულება 14.3 მლნ აშშ დოლარითაა გაზრდილი.
ქართული თხილის ექსპორტი, ძირითადად, ევროკავშირის ბაზრებზე ხორციელდება, კერძოდ, გერმანიაში (2 233 ტონა), იტალიაში (1 507 ტონა), ჩეხეთში (470 ტონა), პოლონეთში (298 ტონა), ბულგარეთში (220 ტონა), ესპანეთში (209 ტონა), საფრანგეთში (191 ტონა), ლიეტუვაში (203 ტონა), საბერძნეთში (97 ტონა), ესტონეთში (88 ტონა), ლატვიაში (62 ტონა), სლოვაკეთში (37 ტონა), ავსტრიასა (22 ტონა) და ხორვატიაში (10 ტონა).
ქართული თხილი ექსპორტზე გადის ასევე ისეთ ქვეყნებში, როგორებიცაა რუსეთი, სომხეთი, ბელარუსი, უკრაინა, ალჟირი, ბრაზილია, კანადა, საუდის არაბეთი, მექსიკა, ერაყი, დიდი ბრიტანეთი, აშშ და სხვ.
2016 წლიდან, აზიური ფაროსანას და სოკოვანი დაავადებების გავრცელების შედეგად, საქართველოში თხილის წარმოება და, შესაბამისად, ექსპორტი მცირდებოდა. 2018 წელს ექსპორტის მაჩვენებელმა მინიმალურ ნიშნულს – 17 ათას ტონას მიაღწია.
2020 წელს მაღალი ხარისხის თხილის საპროგნოზო მოსავალი 50 ათასი ტონაა. წელს თხილის დაბინავების პროცესში ჩართულია 30-ზე მეტი საწარმო.
