თბილისი, 22 ოქტომბერი – Sputnik. ქუთაისის საკრებულოს თავმჯდომარის მოადგილეს რამაზ ჩხიკვაძეს კორონავირუსი დაუდასტურდა.
აღნიშნული ინფორმაცია ჩხიკვაძემ საკუთარ Facebook-გვერდზე გაავრცელა და მოსახლეობას ჯანდაცვის რეკომენდაციების დაცვისკენ მოუწოდა.
„კოვიდინფიცირებულთა რიგები ჩემი სახით კიდევ ერთით გაიზარდა. გავუფრთხილდეთ ერთმანეთს“, – დაწერა ჩხიკვაძემ.
როგორც ქუთაისის საკრებულოში აცხადებენ, რამაზ ჩხიკვაძე 11 დღის განმავლობაში თვითიზოლაციაში იმყოფებოდა და კორონავირუსზე დადებითი პასუხი PCR-ტესტის განმეორებით ჩატარების შემდეგ მიიღო. იგი მკურნალობის კურსს სახლში, ოჯახის ექიმის მეთვალყურეობის ქვეშ აგრძელებს.
გავრცელებული ინფორმაციით, ამ დროისთვის შენობაში სადეზინფექციო სამუშაოები ტარდება, მუნიციპალიტეტის წარმომადგენლობითი ორგანო კი მუშაობის დისტანციურ რეჟიმზე გადავიდა.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 1595-ით გაიზარდა და საერთო რიცხვმა 22803-ს მიაღწია. ამ დროისათვის სულ გამოჯანმრთელდა 9401 ადამიანი, გარდაიცვალა 178 პაციენტი.
საქართველოში კორონავირუსის პირველი შემთხვევა 26 თებერვალს დაფიქსირდა.
