თბილისი, 21 ოქტომბერი – Sputnik. კორონავირუსი კიდევ ერთ ქართველ მომღერალს დაუდასტურდა. ამის შესახებ სოფო გელოვანმა ცოტა ხნის წინ „ფეისბუქზე“ თავად დაწერა.
„ჩემთანაც მოვიდა“, – წერს სოფო, რომელსაც მეგობრები ამხნევებენ. სოფო წერს, რომ კორონავირუსი მეოთხე დღეა აქვს და ეს ჯერჯერობით მხოლოდ ყელის სუსტი ტკივილით გამოიხატება.
მანამდე კორონავირუსი სოფო გელოვანის მეგობარს, მომღერალ ნოდიკო ტატიშვილსაც დაუდასტურდა.
ბოლო 24 საათში საქართველოში კორონავირუსით 14 პაციენტი გარდაიცვალა და მათი საერთო რაოდენობა 172-მდე გაიზარდა. შესაბამისი ინფორმაცია საქართველოს მთავრობის სპეციალურ ვებ-გვერდზე stopcov.ge განახლდა.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 1351-ით გაიზარდა და საერთო რიცხვმა 21208-ს მიაღწია.
ამ დროისათვის სულ გამოჯანმრთელდა 9003 ადამიანი, გარდაიცვალა – 172, კარანტინის რეჟიმში იმყოფება 4462, სტაციონარებში ექიმების დაკვირვების ქვეშ 3071 პაციენტია, ხოლო კოვიდ–სასტუმროებში 1772 ადამიანი იმყოფება.
ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.
საქართველოში კორონავირუსის პირველი შემთხვევა 26 თებერვალს დაფიქსირდა.
