შორენა ბეგაშვილი თავის გადაცემაში „შორენას ეფექტი” თავის ისტორიას ჰყვება. აღმოჩნდა, რომ როდესაც ბეგაშვილი 13 წლის იყო, ოჯახის შექმნის მიზნით მოიტაცეს, თუმცა მან სახლიდან გაპარვა შეძლო და თავის ოჯახს დაუბრუნდა.
„ის კაცი ჩემზე 11 წლით უფროსი იყო. კახეთის ერთ-ერთ სოფელში წამიყვანეს. იმ ღამეს, როცა დიასახლისმა ჩემი ასაკი გაიგო, ჩემთან დაწვა. ცოლის მოყვანა აღნიშნული იყო, სუფრა კი გაშლილი. გამთენიისას სიცივემ გამაღვიძა, კარი ჩუმად გავაღე და გამოვიპარე. ღობეზე გადავძვერი, სოფელი თვალის დახამხამებაში დავტოვე. სანამ ავტობუსი ჩამოივლიდა, ბენზინგასამართ სადგურზე მაგიდის ქვეშ დამმალეს. მე, 13 წლის ბავშვმა უარი ვთქვი 24 წლის კაცის ცოლობაზე“, – ამბობს შორენა ბეგაშვილი.
შორენა ბეგაშვილის ბიოგრაფია ფაქტობრივად ყველამ იცის. სექს-სიმბოლომ ეროტიკული ფილმებითა და ფოტომოდელობით მიიქცია ყურადღება და ახლა ერთ-ერთი ყველაზე პოპულარული ქალია საქართველოს ტელეინდუსტრიაში. როგორც თავად ჰყვება, რთული ცხოვრების მიუხედავად ძალები მოიკრიბა, რუსთავიდან თბილისში ჩამოვიდა და კარიერა აიწყო.
შორენა ბეგაშვილმა რამდენიმე კვირაა საკუთარი გადაცემა დაიწყო. ყველა გადაცემაში ცნობილი მოდელი და ტელეწამყვანი საკუთარ ისტორიებს ჰყვება. ასე გაიგო ცოტა ხნის წინ საზოგადოებამ, რატომ დაშორდა ბიზნესმენ მეუღლეს ირაკლი ნანაძეს და ვინ არის მისი ახლანდელი რჩეული, რომელთანაც ის თავს არაჩეულებრივად გრძნობს.
ზუსტად ერთი წელია, რაც შორენა ბეგაშვილი ბიზნესმენ ირაკლი ნანაძეს ოფიციალურად დაშორდა, თუმცა საზოგადოებამ ისიც კი არ იცოდა, რომ წყვილი დაქორწინებული იყო. ყველაფერი გასაიდუმლოებული იყო მანამ, სანამ შორენამ იუსტიციის სახლიდან განქორწინების მოწმობის ფოტო არ გამოაქვეყნა. მაშინ არავინ იცოდა წყვილის დაშორების მიზეზი, თუმცა ამბობდნენ, რომ შორენა ე.წ. კანონიერ ქურდზე, თურქეთში მცხოვრებ ლაშა ბარათელზე იყო შეყვარებული, რომელიც ჯერ კიდევ ქორწინებაში მყოფ ფოტომოდელს ძვირადღირებულ საჩუქრებს უგზავნიდა.
