თბილისი, 14 ოქტომბერი – Sputnik. სახელმწიფოს პოლიტიკა არის ასეთი: არ იქნება დიდი, გლობალური შემზღუდველი ღონისძიებები, მაგრამ იქნება სხვადასხვა სახის წერტილოვანი შეზღუდვები, განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ საკოორდინაციო საბჭოს სხდომის დასრულების შემდეგ.
თბილისში კორონავირუსის რეკორდული მაჩვენებელი დაფიქსირდა>>
როგორც გამყრელიძემ აღნიშნა, საქართველოში, ისევე, როგორც მსოფლიოს სხვა ქვეყნებში, მკაცრ შეზღუდვებს ვეღარ გამოაცხადებენ.
„ჩვენ იმედი გვქონდა, რომ როგორც რესპირაციული ინფექცია, კორონავირუსი ზაფხულში შემცირდებოდა და შეიძლება გამქრალიყო. ამიტომ დაავადების დასაწყისში ერთადერთი ბერკეტი მასთან ბრძოლის იყო მძიმე და მკაცრი შემზღუდველი ღონისძიებები. შემდეგ კაცობრიობამ გაიაზრა, რომ ეს არ არის მარტივი ინფექცია. მიუხედავად იმისა, რომ ინფექცია მსუბუქდება, არ გამქრალა“, – განაცხადა ამირან გამყრელიძემ.
დაავადებათა კონტროლის ეროვნული ცენტრის ხელმძღვანელმა აღნიშნა, რომ დროა მოსახლეობამ კორონავირუსთან თანაცხოვრება ისწავლოს, რადგან მსოფლიოს გამოცდილებაც აჩვენებს, რომ ქვეყნები ვეღარ ჩაიკეტებიან.
სექტემბრის დასაწყისიდან საქართველოში მკვეთრად იმატა კორონავირუსით ინფიცირებულთა რაოდენობამ. ბოლო დღეების ყოველდღიური მაჩვენებელი 500-ის ფარგლებში მერყეობდა, დღეს კი ყველაზე ბევრი – 680 შემთხვევა დაფიქსირდა.
ამ დროისთვის საქართველოში კორონავირუსის 13 521 შემთხვევაა დადასტურებული. სულ გამოჯანმრთელდა 7 157 ადამიანი, გარდაიცვალა 109 პაციენტი. კარანტინის რეჟიმში საქართველოს 5 590 მოქალაქე იმყოფება, ხოლო სტაციონარებში მეთვალყურეობას 836 ადამიანი გადის.
კორონავირუსის პირველი შემთხვევა საქართველოში 26 თებერვალს დაფიქსირდა.
