თბილისი, 8 სექტემბერი – Sputnik. 19 წლის ფეხბურთელის გიორგი შაქარაშვილის მკვლელობაში არასრულწლოვანი ბრალდებულის მამამ თბილისში, მთავარი პროკურატურის შენობასთან თავის დაწვა სცადა, იუწყება ტელეკომპანია Rustavi2.
თამაზ ხომასურიძემ ბენზინი გადაისხა და თავის მოკვლით დაიმუქრა. პოლიციამ დროულად შეძლო მისთვის სანთებელის წართმევა. ადგილზე მობილიზებულია სახანძრო და სასწრაფო სამედიცინო სამსახურები.
მამაკაცი, რომელიც დარწმუნებულია თავისი შვილის უდანაშაულობაში, ამგვარად ცდილობდა პროკურორთან შეხვედრას.
ეს პირველი შემთხვევა არაა, როდესაც ხომასურიძე საჯაროდ თავის მოკვლით იმუქრება. მან და ოჯახის სხვა წევრებმა უფრო ადრე შიმშილობა დაიწყეს, რომელიც ექვს დღეს უნდა გაგრძელებულიყო და ამის შემდეგ ხომასურიძე თავის მოკვლით იმუქრებოდა.
შაქარაშვილის მკვლელობის საქმეში ხუთი ადამიანია ბრალდებული, მათ შორის ორი – არასრულწლოვანი. გამოძიება ამტკიცებს, რომ მათ ჯერ სცემეს შაქარაშვილი, ხოლო შემდეგ მდინარეში გადააგდეს, სადაც 19 წლის ფეხბურთელი დაიხრჩო. ახალგაზრდის ცხედარი ძებნიდან ოთხი დღის შემდეგ იპოვეს მდინარე არაგვში.
ბრალდებულების ასაკის გამო სასამართლო პროცესი პრესისა და საზოგადოებისთვის დახურულია.
