თბილისი, 26 აგვისტო – Sputnik. კინოთეატრებსა და თეატრებში მაყურებელს პირბადით დაუშვებენ და თითო სკამის გამოტოვებით განათავსებენ, განაცხადა ჯანდაცვის სამინისტროს შრომის პირობების ინსპექტირების დეპარტამენტის უფროსმა ბექა ფერაძემ საკოორდინაციო საბჭოს სხდომის დასრულების შემდეგ გამართულ ბრიფინგზე.
დღეს ცნობილი გახდა, რომ კინოთეატრები მუშაობას 15 სექტემბრიდან, ხოლო თეატრები 1 ოქტომბრიდან განაახლებენ.
ფერაძის განმარტებით, თერმოსკრინინგისა და დეზინფექციის ჩატარების შესახებ ზოგადი რეკომენდაციები კინოთეატრებსა და თეატრებში უცვლელი რჩება.
„მოგახსენებთ იმ რეკომენდაციებს, რაც ჯანდაცვის სამინისტროს მხრიდან იქნება დაწესებული. ზოგადი მოთხოვნები, რაც შეეხება თერმოსკრინინგის ჩატარებასა და სადეზინფექციო სამუშაოების განხორციელებას, უცვლელი რჩება. 5 კვადრატულ მეტრზე იქნება ერთი ადამიანის დაშვება“, – განაცხადა ფერაძემ.
რაც შეეხება თეატრს, განისაზღვრა ღონისძიების ჩატარების დროის მონაკვეთის ზედა ზღვარი, კერძოდ, თეატრში მაყურებლის ყოფნის მაქსიმალური დრო 3 საათი იქნება და ის მოიცავს როგორც შენობაში შესვლის, ისე დატოვების პროცესს. ღონისძიება უნდა გაიმართოს უწყვეტად, ანტრაქტის გარეშე.
კორონავირუსის გავრცელების პრევენციის გამო საქართველოში კინოთეატრები და თეატრები მარტის შემდეგ დახურულია.
