თბილისი, 21 აგვისტო – Sputnik. შრომის ინსპექციის უფლებამოსილება იზრდება და ამიერიდან, აუცილებლობის შემთხვევაში, მას ამა თუ იმ ობიექტის დახურვის უფლება მიეცემა, განაცხადა საქართველოს ჯანდაცვის მინისტრმა ეკატერინე ტიკარაძემ.
ტიკარაძე: ჩვენ საქართველოში შრომის უსაფრთხოების კულტურა დავნერგეთ>>
იმ შემთხვევაში, თუ ობიექტი ერთხელ დაჯარიმების შემდეგ ხელმეორე შემოწმებისას მაინც ვერ დააკმაყოფილებს აუცილებელ ნორმებს, შრომის ინსპექციას მისი დახურვის უფლება ექნება.
ტიკარაძის განცხადებით, ამ დროისათვის, პანდემიის პირობებში, შრომის ინსპექციამ 100-ზე მეტი ობიექტი დააჯარიმა.
„შრომის ინსპექცია არ აჯარიმებს ფიზიკურ პირებს, შრომის ინსპექცია მუშაობს მხოლოდ იურიდიული პირების დაჯარიმებაზე. ეს არის ჩვენი კომპეტენციის ფარგლები... გამომდინარე იქიდან, რომ რიგ შემთხვევებში ისინი განმეორებითი შემოწმების შემთხვევაშიც ვერ აკმაყოფილებდნენ იმ საჭირო ზომებს, რომლებიც მითითებულია ჩვენი მხრიდან... შრომის ინსპექციამ შეიძინა კიდევ დამატებით ბერკეტი. იმ შემთხვევაში, თუ ობიექტი დაჯარიმების შემდგომაც, განმეორებითი შემოწმებისას ვერ აკმაყოფილებს საჭირო ნორმებს და მოთხოვნებს... მას ექნება უკვე ლეგიტიმური უფლება, დახუროს ობიექტი“, – განაცხადა ტიკარაძემ.
რესტორნების, ბარებისა და კაფეების მუშაობაზე შეზღუდვების მოხსნასთან ერთად მათთვის, მათი პერსონალისა და სტუმრებისთვის რიგი სავალდებულო მოთხოვნები შემუშავდა, რაც კორონავირუსის გავრცელების აღკვეთას ემსახურება. ახალი წესების შეუსრულებლობა ჯარიმით ისჯება. ობიექტებს შრომის ინსპექციის სპეციალისტები ამოწმებენ.
ტურიზმი პანდემიის დროს: რამდენმა სასტუმრომ მიიღო მუშაობის ნებართვა>>
სპეციალისტები ასევე აქტიურად ამოწმებენ ქვეყნის ბაზრობებსა და ბაზრებს.
ჯანდაცვის სამინისტროს რეკომენდაციების შეუსრულებლობისთვის ჯარიმა 10 ათასი ლარია იურიდიული პირებისთვის და 2 ათასი ლარი – ფიზიკური პირებისთვის.
