ნინო სურგულაძე პირად ცხოვრებას საჯაროდ არასდროს განიხილავს. ფეხმძიმობის შესახებ კი ერთ-ერთი გადაცემის პირდაპირ ეთერში გაამხილა. მომღერალმა ეს ნაბიჯი რთულად გადადგა. მას წამოზრდილი მუცელი ეტყობოდა, რის გამოც საიდუმლო უკვე ყველას გაანდო.
ოპერის მომღერლის რჩეული იურისტი გიორგი ინწკირველია. ის ცნობილი იურისტისა და მეცნიერის, თბილისის სახელმწიფო უნივერსიტეტის იურიდიული ფაკულტეტის დეკანის გივი ინწკირველის შვილიშვილია. წყვილს ქალ-ვაჟი შეეძინა. პატარა ნატალიასა და ზაქარიას ცნობილი მშობლები დიდი სიყვარულით უვლიან. ამის ამსახველი უსაყვარლესი სურათები მეცო-სოპრანომ სოციალურ ქსელში თავად გამოაქვეყნა.
„სიტყვები, განცდები, გრძნობები - მგონი, ვერაფერი გამოხატავს იმას, რაც ახლა ჩემ ცხოვრებაში ხდება. ასე მგონია, ამ წუთამდე, ნატალიას და ზაქარიას დაბადებამდე არაფერი ყოფილა თურმე მსგავსი ემოციის მომტანიც კი, არ განმიცდია, არ გამხარებია ასე სრულყოფილად“, – ეს სიტყვები ნინომ სამშობიაროშივე დაწერა.
„ახლა, როგორც არასდროს, ისე ძალიან მინდა, ყველა ქალს მიეცეს ეს ძალა, ყველა ქალმა იგრძნოს მისი ახალდაბადებული შვილის სურნელი, პატარა თითების სითბო, რომელსაც ვერასოდეს ვერაფერი შეცვლის“, – ამ პოზიტიური სიტყვებით დაასრულა ვრცელი პოსტი ნინო სურგულაძემ.
უცნობია, როდის დაიწყო წყვილის სიყვარულის ისტორია, თუმცა ახლა მათ ცხოვრებაში სასიხარულო სიახლეა. ნინო სურგულაძის პოსტს „ფეისბუქზე“ უამრავი გამოხმაურება მოჰყვა. წყვილს ულოცავენ და ბედნიერებას უსურვებენ. ნინო სურგულაძე, წარმატებული კარიერის გარდა, ქველმოქმედებით არის დაკავებული. 42 წლის მეცო-სოპრანოს საერთაშორისო საქველმოქმედო ფონდი „ნატვრის ხე“ ეხმარება ჯანმრთელობის პრობლემების მქონე ბავშვებს, რომლებსაც საზღვარგარეთ მკურნალობა ესაჭიროებათ.
