თბილისი, 22 ივლისი - Sputnik. თუშეთისკენ მიმავალი ფშაველი-აბანო-ომალოს საავტომობილო გზა გადაკეტილია - უხვი ნალექის გამო მის რამდენიმე მონაკვეთზე ჩამოიშალა გზა, იუწყება საქართველოს საპატრულო პოლიციის დეპარტამენტი.
დეპარტამენტის მონაცემებით, ჩამოშლა მოხდა გზის 36-40 კმ მონაკვეთზე.
გზის გაწმენდითი სამუშაოები დაწყებულია.
„ადგილზე მობილიზებულია თუშეთის გზის მოვლა-პატრონობაზე პასუხისმგებელი კომპანიის შესაბამისი ტექნიკა და მიმდინარეობს გაწმენდითი სამუშაოები“, – განაცხადა პირველი არხის ეთერში ახმეტის მუნიციპალიტეტის მერის წარმომადგენელმა ლადო კახოიძემ.
თუშეთის საავტომობილო გზა ერთ-ერთი ყველაზე სახიფათოდ მიიჩნევა არამარტო საქართველოში, არამედ მსოფლიოში. ის ღიაა მაისიდან ოქტომბრამდე, დანარჩენ ექვს თვეში კი გაუვალი ხდება. ეს ქალაქ თელავისა და სოფელ ომალოს ერთადერთი დამაკავშირებელი გზაა და მისი სიგრძე 72 კილომეტრია.
