თბილისი, 20 ივლისი — Sputnik. ქართველმა სუმოისტმა ლევან გორგაძემ, იგივე ტოჩინოშინმა ტოკიოში მიმდინარე ივლისის ბაშოზე პირველი მარცხი განიცადა.
შეჯიბრის მეორე დღეს ტოჩინოშინი, რომელიც დასავლეთის მე-11 მაეგაშირას რანგში იმყოფება, 33 წლის სუმოისტ კაისეის დაუპირისპირდა, რომელიც აღმოსავლეთის მე-10 მაეგაშირაა. ორთაბრძოლა კაისეის გამარჯვებით დასრულდა.
ამ გამარჯვებით ბრაზილიელმა სუმოისტმა ტოჩინოშინთან პირადი შეხვედრების ანგარიშში სხვაობა შეამცირა – 12:8 ქართველი გოლიათის სასარგებლოდ.
ტოკიოს ივლისის ბაშოს მესამე დღეს ტოჩინოშინი დასავლეთის მეათე მაეგაშირას დაუპირისპირდება. მოწინააღმდეგეებს შორის ეს რიგით 26-ე შერკინება იქნება. ჯერჯერობით მინიმალური უპირატესობა (13:12) იაპონელ სუმოისტს აქვს.
ტურნირი 2 აგვისტომდე გაგრძელდება.
