თბილისი, 1 ივლისი — Sputnik. სახელმწიფოსგან კომპენსაციის მისაღებად იმ მოქალაქეთა განცხადებების მიღების ვადა, რომლებმაც სამსახური კორონავირუსის პანდემიის გამო დაკარგეს, 1 ივლისს ამოიწურა.
15 ივლისამდე განცხადების შეტანა ჯერ კიდევ შეუძლიათ იმ მოქალაქეებს, რომლებიც საზღვარგარეთ სეზონულ სამუშაოებზე იყვნენ დასაქმებული.
ამ კატეგორიის მოქალაქეებს არანაირი დამადასტურებელი დოკუმენტის წარმოდგენა არ ევალებათ, მხოლოდ საჭიროა 15 ივლისამდე დარეგისტრირდნენ ჯანდაცვის სამინისტროს შესაბამის პორტალზე, ხოლო საზღვრის კვეთის შესახებ დამადასტურებელ ინფორმაციას სამინისტრო შინაგან საქმეთა სამინისტროსგან მიიღებს.
რეგისტრაციის გავლა შეუძლიათ იმ პირებს, რომლებიც 2019 წლის განმავლობაში სეზონურ სამუშაოებზე იყვნენ დასაქმებული და მარტიდან ოქტომბრის ჩათვლით 30-დან 120 დღემდე პერიოდში საზღვარგარეთ იმყოფებოდნენ.
კომპენსაციის მიღებას ექვემდებარება ადამიანების კიდევ ერთი კატეგორია – ის ადამიანები, რომელთა საქმიანობაც საზღვრის რეგულარულ კვეთასთან არის დაკავშირებული. თუ 2019 წელს მათ 60-ზე მეტჯერ გადაკვეთეს საზღვარი, მათაც შეუძლიათ კომპენსაციის მიღების იმედი ჰქონდეთ. მათ არ სჭირდებათ რაიმე დოკუმენტების წარმოდგენა, გარდა პასპორტის გვერდის ან პირადობის დამადასტურებელი დოკუმენტის ასლისა.
29 ივნისის მონაცემებით, საქართველოს ჯანდაცვის სამინისტროს ვებ-გვერდზე 300-ლარიანი კომპენსაციის მიღების მიზნით რეგისტრაცია 156186-მა ადამიანმა გაიარა. მათგან 104 547 თვითდასაქმებულმა პირმა უკვე მიიღო 300-ლარიანი კომპენსაცია. სახელმწიფომ მთლიანობაში გადარიცხა დაახლოებით 31,4 მილიონი ლარი.
მათ გარდა ამ დროისათვის ფულადი დახმარება მიიღო პანდემიამდე კონტრაქტით დასაქმებულმა ან დეკრეტულ შვებულებაში მყოფმა და სამსახურდაკარგულმა 90775-მა მოქალაქემ. ისინი ექვსი თვის განმავლობაში 200-ლარიან დახმარებას მიიღებენ. გადარიცხულმა თანხამ 18,1 მილიონი ლარი შეადგინა. ფულადი დახმარების ჩარიცხვა ეტაპობრივად ხდება.
იმ პირთა რეგისტრაცია, რომლებმაც კორონავირუსის პანდემიის გამო შემოსავალი დაკარგეს, 15 მაისს დაიწყო და 1 ივლისს დასრულდა.
