კორონავირუსის პანდემიამ და შეზღუდვებმა მსოფლიოს მრავალ ქვეყანაში შემოსავლის გარეშე დატოვა სხვადასხვა პროფესიების უამრავი ადამიანი. ტურიზმის სექტორის გარდა, სხვა სფეროებში მოღვაწე ადამიანებიც დაზარალდნენ. მუდმივი სამსახური დაკარგეს ფოტოგრაფებმა, ვიდეო-ოპერატორებმა, წამყვანებმა, ანიმატორებმა და მუსიკოსებმა. მათ უკვე მეორედ გამართეს საპროტესტო აქცია საქართველოს მთავრობის კანცელარიასთან, სადაც დიდი ღონისძიებების გამართვის ნებართვას მოითხოვდნენ.
პარასკევს კანცელარიის შენობასთან ათობით ადამიანმა მოიყარა თავი საპროტესტო აქციაზე
ზოგიერთმა მონაწილემ პლაკატი მოიტანა, ზოგმაც ადგილზე დაამზადა
აქციაზე გამოჩნდნენ ახალგაზრდები, რომლებმაც ქორწილი განასახიერეს
ფოტოგრაფებმა, ვიდეო-ოპერატორებმა, წამყვანებმა, ქორწილების ორგანიზატორებმა და რესტორატორებმა დიდი ღონისძიებების გამართვის ნებართვა მოითხოვეს
კორონავირუსის პანდემიისა და აკრძალვების გამო, მათ შემოსავლის დიდი ნაწილი დაკარგეს
ზოგიერთი მათგანი, საერთოდ რეგულარული შემოსავლის გარეშე დარჩა
აქციის მონაწილეები ხელისუფლებას მათ მდგომარეობაში შესვლას და აკრძალვის მოხსნას თხოვენ
მომიტინგეთა შორის იყვნენ მომღერლები და მუსიკოსებიც
შეზღუდვები ეტაპობრივად იხსნება, თუმცა როდის დაიშვება დიდი ღონისძიებების გამართვა, ჯერ-ჯერობით უცნობია
კორონავირუსის გავრცელების რისკის გამო ახლა საქართველოში აკრძალულია ქორწილები, დაკრძალვა, ნათლობა, და ყველა სხვა მასობრივი თავშეყრა
ასევე აკრძალულია რესტორნებში ხმამაღლა ცოცხალი მუსიკის დაკვრა - იმისათვის, რომ ადამიანებს შორის ნაკლებად იყოს ახლო კონტაქტი. მაგალითად, ცეკვის დროს, ან ხმარუსი გამო ახლო მანძილიდან საუბრისას
ბოლო თვეში ასეთი აქცია უკვე მეორეჯერ გაიმართა თბილისში
თბილისში გამართული საპროტესტო აქციის მსგავსი გაიმართა ბათუმშიც
როგორც აქციის ორგანიზატორები აცხადებენ, საქართველოში გასართობ ინდუსტრიაში დასაქმებულია დაახლოებით შვიდი ათასი ადამიანი. ესენი არიან არა მხოლოდ მომღერლები, მუსიკოსები, წამყვანები, ფოტოგრაფები და ვიდეო-ოპერატორები, არამედ მზარეულები, ოფიციანტები, ტექნიკური პერსონალი
მკაცრი ზომების გამო ისინი შემოსავლის გარეშე დარჩნენ და ხელისუფლებას მათი პრობლემის მოგვარებას სთხოვენ. ამ დროისათვის უცნობია, როდის დაიშვება საქართველოში მასობრივი ღონისძიებების გამართვა
