თბილისი, 12 ივნისი — Sputnik. ყოფილი პრეზიდენტის ედუარდ შევარდნაძის რძალი, პიანისტი თათია შარანგია სოციალურ ქსელში იმ ნეგატივს ეხმაურება, რომელიც, მისი თქმით, მის 10 წლის ვაჟს დაატყდა თავს.
როგორც თათია შარანგია წერს, იმის გამო, რომ მისი შვილი დიდი ბაბუის მოსახელეა, უარყოფითი კომენტარებით შეამკეს.
„ვისთვის კარგია ბატონი ედუარდი, ვისთვის ცუდი. ყველაფერს ეშველება, მაგრამ იმ კატასტროფას, რასაც ბავშვის მიმართ განუკითხაობა ქვია, იმ საშინელი კომენტარების ავტორების ბინძურ სულს, ვინც ბავშვს აქ წყევლის და ლანძღავს, მათ არაფერი ეშველებათ. გულით მეცოდებიან და გულით მინდა მიეტევოთ, ჩემი 10 წლის შვილის აცრემლებული თვალები, რომელიც ამ კომენტარებს კითხულობს“, – წერს თათია შარანგია.
პიანისტი თათია შარანგია სამ ვაჟთან ერთად გადაცემა „პროფილის“ სტუმარი იყო. თათია შარანგია ფართო საზოგადოებამ რამდენიმე წლის წინ გაიცნო, როდესაც ის ედუარდ შევარდნაძის რძალი გახდა. მოგვიანებით კი თათია სანდრო შელიას გაჰყვა ცოლად. თათია და სანდრო რამდენიმე წელია საქართველოში ცხოვრობენ.
თათია შარანგიასა და ლაშა შევარდნაძის განქორწინების შესახებ ინფორმაცია 2013 წლის მარტის დასაწყისში გავრცელდა. გაყრის ინიციატორი თათია იყო. ხმები მათ ოჯახურ უთანხმოებაზე მანამდეც ვრცელდებოდა. ლაშა შევარდნაძესა და თათია შარანგიას ორი ვაჟი ჰყავთ – ედუარდ და ალექსანდრე შევარდნაძეები.
თათია პიანისტია. სწავლობდა თბილისში, პარიზსა და აშშ-ის სხვადასხვა ქალაქებში. მონაწილეობდა საერთაშორისო კონკურსებში. ხშირად მიემგზავრება სხვადასხვა ქვეყანაში გასტროლებზე. თათიას მშობლები თბილისში ცხოვრობენ. მას დედა ექიმი ჰყავს, მამა ბიზნესმენია.
