თბილისი, 26 მაისი — Sputnik. ტოკიოში სასტუმრო Blossom Hotel-ის შენობაზე ქართული დროშა გამოსახეს - ასე კრეატიულად მიულოცეს იაპონელებმა საქართველოს დამოუკიდებლობის დღე. ვიდეოს საქართველოს საგარეო საქმეთა სამინისტრო თავის Facebook-გვერდზე ავრცელებს.
ოტელის შენობაზე ქართული დროშა სხვადასხვა ნომრებში ანთებული შუქებით შექმნეს. გარდა ამისა, ტოკიოში საქართველოს დროშის ფერებით განათდა ორგანიზაცია Edgeof-ის ოფისი, რომელიც სიბუას გზაჯვარედინზე მდებარეობს.
საქართველო დღეს დამოუკიდებლობის დღეს აღნიშნავს. 1918 წლის 26 მაისს საქართველოს პირველმა დემოკრატიულმა რესპუბლიკამ ნოე ჟორდანიას ხელმძღვანელობით ქვეყნის დამოუკიდებლობა გამოაცხადა. პირველმა დამოუკიდებელმა რესპუბლიკამ სულ ორნახევარი წელი იარსება.
დამოუკიდებლობის აღდგენა 1991 წელს მოხერხდა. რესპუბლიკის უზენაესმა საბჭომ საყოველთაო რეფერენდუმის შედეგების საფუძველზე 9 აპრილს შესაბამისი აქტი მიიღო.
