თბილისი, 11 მაისი — Sputnik. სახიფათო ვირუსის გავრცელების პირობებში უკიდურესად მნიშვნელოვანია იმუნიტეტის გამყარება, მათ შორის, შესაბამისი საკვებით, თუმცა უნდა გახსოვდეთ, რომ არსებობს პროდუქტები, რომლებიც, პირიქით, აქვეითებენ ორგანიზმის დამცავ ფუნქციებს, აცხადებენ ექიმები.
მათი თქმით, სიფრთხილის გამოჩენაა საჭირო ზღვის პროდუქტებთან მიმართებაში, ვინაიდან, მიუხედავად იმისა, რომ ისინი სავსეა ვიტამინებითა და ცილებით, არსებობს სახიფათო ნიუანსები.
კერძოდ, მედიკოსები განმარტავენ, რომ ადამიანის ორგანიზმი იოლად ითვისებს თევზს, მაგრამ ხამანწკების, კალმარების, კრევეტებისა და მიდიების ცილა პოტენციურად საშიშია. მაგალითად, მოლუსკების ხორცი ძლიერი ალერგენია და იმ შემთხვევაშიც კი, თუ ალერგიული რეაქცია არ ვლინდება, ეს პროდუქტები მაინც ნეგატიურ ზემოქმედებას ახდენს იმუნურ სისტემაზე და მოწყვლადს ხდის მას.
როგორ გავაძლიეროთ იმუნიტეტი ვირუსის წინააღმდეგ და როგორ დავხვდეთ კორონავირუსს მზადყოფნაში>>
აღსანიშნავია, რომ ექიმები არავითარ შემთხვევაში არ გასცემენ დასახელებული ზღვის პროდუქტების რაციონიდან სრულად ამოღების რეკომენდაციას. მათი თქმით, საკმარისია მისი შემცირება კვირაში მაქსიმუმ ორჯერ მიღებამდე. ეს შეზღუდვა არ ეხებათ ზღვის პირას დაბადებულ ადამიანებს და კიდევ მათ, ვინც ზღვის პროდუქტებს ბავშვობიდან მიირთმევს.
გარდა ამისა, ასევე საშიშია უმი კვერცხის ყლაპვა, რასაც არაერთი ადამიანი მისდევს. ამას შეუძლია კუჭ-ნაწლავის ტრაქტს ბიოტონის ათვისების უნარი დაუკარგოს, რომელიც ფერმენტულ სისტემებსა და მეტაბოლიზმზე აგებს პასუხს. ბიოტონის დეფიციტი აქვეითებს იმუნიტეტს და უარყოფითად მოქმედებს ლიმფურ კვანძებზე, ძვლის ტვინსა და თიმუსის ჯირკვალზე.
გარდა ამისა, დიდი ხანია დამტკიცებულია, რომ ტკბილეულის მოყვარულები ხშირად ავადმყოფობენ გაცივებებით — ზაფხულობითაც კი. ეს დაკავშირებულია იმასთან, რომ ორგანიზმში მოხვედრილი შაქარი იწყებს სისხლის თეთრი სხეულების დათრგუნვას და, ამასთან, ბლოკავს თიმუსის მუშაობას, რომლის ფუნქციაც ორგანიზმის დაცვაა. ასე რომ, ტკბილეულით გატაცებას მარტო ზედმეტი კილოგრამები კი არ მოსდევს, არამედ ეს მძლავრად ურტყამს იმუნურ სისტემას.
ექიმები თქმით, ორგანიზმისთვის მავნე პროდუქტებს ასევე განეკუთვნება გაზირებული სასმელები, ცომეული ნაწარმი, საღეჭი რეზინები და სხვა მრავალიც სწრაფი ნახშირწყლების სერიიდან.
