თბილისი, 6 მაისი - Sputnik. საქართველოს პრეზიდენტი სალომე ზურაბიშვილი რუმინელ კოლეგა კლაუს იოჰანისს ტელეფონით ესაუბრა, იუწყება სახელმწიფო მეთაურის პრეს-სამსახური.
პრეზიდენტებმა განიხილეს მსოფლიოსა და საკუთარ ქვეყნებში კორონავირუსის პანდემიასთან დაკავშირებული ვითარება და მისი ზეგავლენა ეკონომიკაზე.
სალომე ზურაბიშვილმა აღნიშნა, რომ ტურიზმი როგორც საქართველოში, ისე რუმინეთში ეკონომიკის ერთ-ერთი ყველაზე მეტად დაზარალებული სფეროა და პოსტკრიზისულ პერიოდში აუცილებელია აქტიური თანამშრომლობა და მუშაობა მისი აღორძინებისთვის.
როგორც განცხადებაშია აღნიშნული, ორი ქვეყნის პრეზიდენტებმა ასევე განიხილეს როგორც ორმხრივ, ისე მრავალმხრივ ფორმატში ქართულ–რუმინული ურთიერთობების სხვა აქტუალური საკითხები.
რუმინეთის პრეზიდენტმა ღრმა მწუხარება გამოხატა და მიუსამძიმრა პანდემიისას გარდაცვლილი საქართველოს მოქალაქეების ოჯახებს.
