თბილისი, 30 აპრილი — Sputnik. ბავშვები ინფიცირდებიან ახალი კორონავირუსით და ავადდებიან COVID-19-ით, მაგრამ ამ დროისათვის უცნობია, რამდენად შეიძლება იყვნენ ისინი გადამდებნი სხვებისთვის, განაცხადა ჯანდაცვის მსოფლიო ორგანიზაციის ექსპერტთა ჯგუფის ხელმძღვანელმა ადამ ფინმა ონლაინ-ბრიფინგზე.
„ამ დროისათვის ვიცით, რომ, მცირე გამონაკლისებით, ბავშვები უმნიშვნელო ფორმით ინფიცირდებიან. მაგრამ ცუდადაა ცნობილი, შეიძლება თუ არა იყვნენ ისინი გადამდებნი სხვა ბავშვებისთვის ან საკუთარი ოჯახის წევრებისთვის“, — აღნიშნა ექსპერტმა.
ადამ ფინის თქმით, ნიდერლანდებიდან და ავსტრალიიდან მიღებული მონაცემები, რომელთა თანახმადაც ბავშვები უფრო იშვიათად ინფიცირდებიან, ვიდრე ზრდასრულები, წინასწარია და დამაჯერებლობას მოკლებული.
ექსპერტი აცხადებს, რომ ბავშვები ნამდვილად ავადდებიან COVID-19-ით და ამიტომ მტკიცება იმისა, რომ უფროსები მათგან გარანტირებულად არ ინფიცირდებიან, არასწორია.
მანამდე გავრცელდა ინფორმაცია, რომ მსოფლიოს რამდენიმე ქვეყანაში ბავშვთა შორის თავი იჩინა კავასაკის სინდრომის მსგავსმა დაავადებამ. ექიმები ჯერჯერობით ზუსტად ვერ ამბობენ, არსებობს თუ არა კავშირი კორონავირუსსა და ახალ სინდრომს შორის.
