თბილისი, 27 აპრილი — Sputnik. ბათუმის საერთაშორისო აეროპორტში პოლონეთიდან სპეციალური ავიარეისი განხორციელდა, რომლითაც სამშობლოში საქართველოს 179 მოქალაქე დაბრუნდა, იუწყება საზოგადოებრივი მაუწყებლის პირველი არხი.
საქართველომ 20 მარტიდან ავიამიმოსვლა სხვა ქვეყნებთან პრაქტიკულად მთლიანად შეწყვიტა. ფრენებს ახორციელებს მხოლოდ კომპანია Georgian Airways, რომელსაც საქართველოს მოქალაქეები საზღვარგარეთის ქვეყნებიდან ჩამოჰყავს. საქართველოს მთავრობა განაგრძობს ქვეყნის მოქალაქეების სამშობლოში დაბრუნებას.
პოლონეთის დედაქალაქიდან სპეცრეისი ბათუმში უცხოეთში მყოფი საქართველოს მოქალაქეების სამშობლოში ეტაპობრივი დაბრუნების პროცესის ფარგლებში განხორციელდა.
ეკონომიკის სამინისტროს ინფორმაციით, სპეცრეისის მგზავრებმა აეროპორტშივე გაიარეს სამედიცინო შემოწმება. შემდეგ კი ისინი ავტობუსებით სასტუმრო „ეიფორიაში“ გახსნილ კარანტინის ზონაში გადაიყვანეს.
ეკონომიკის სამინისტროს ინფორმაციით, საპრევენციო ღონისძიებების ფარგლებში, მთავრობის საკოორდინაციო საბჭოს გადაწყვეტილებითა და მთავრობის დადგენილებით, ეკონომიკის სამინისტროს ტურიზმის ეროვნული ადმინისტრაციის ორგანიზებით კარანტინის სივრცე საქართველოს მასშტაბით ამ დროისთვის 83 სასტუმროში მოქმედებს. ამჟამად კარანტინში 4932 ადამიანი იმყოფება.
უწყების ცნობით, საკარანტინო სივრცეებში არსებული პირობები სრულ შესაბამისობაშია საერთაშორისო ჯანდაცვის ორგანიზაციისა და საკარანტინო სივრცეების მოწყობის შესახებ ეროვნული კანონმდებლობით გათვალისწინებულ ნორმებთან.
14-დღიანი კარანტინის დროს უცხოეთიდან დაბრუნებული მოქალაქეები 24-საათიანი სამედიცინო მეთვალყურეობის ქვეშ იქნებიან.
მსოფლიოში საშიში ვირუსის გავრცელებასთან დაკავშირებით საქართველოს საგარეო უწყება, უცხოეთში დიპლომატიურ მისიებთან კოორდინირებულად, აქტიურად ეხმარება ქვეყნის მოქალაქეებს, რომლებიც საქართველოს საზღვრებს გარეთ იმყოფებიან. მათ, საჭიროებისამებრ, უზრუნველყოფენ საცხოვრებლით, საკვებითა და მედიკამენტებით, ასევე ეხმარებიან სამშობლოში დაბრუნებაში.
მომდევნო რეისების განრიგი:
30 აპრილი – მადრიდი–თბილისი
2 მაისი – პრაღა–თბილისი
5 მაისი – ათენი–თბილისი
7 მაისი – ამსტერდამი–თბილისი
9 მაისი – ბერლინი–თბილისი
რეისებს ქართული ავიაკომპანია Georgian Airways შეასრულებს.
თითოეული დაბრუნებული მოქალაქე სპეციალურ ზონებში მედიკოსების დაკვირვებით სავალდებულო ორკვირიან კარანტინს გაივლის.
